Home International Obheto misterioso descubri den desierto na Utah

Obheto misterioso descubri den desierto na Utah

SHARE

SALT LAKE CITY – E ekipo di un helicopter a descubri un obheto di metal misterioso den e desierto di e estado Mericano di Utah. E grupo a encontra un columna di metal di mas o menos 3,5 meter. E obheto no tawata parce algo cu a cai for di shelo, e tawata pega duro den barancanan den tera.
E grupo no tin idea kiko e obheto aki ta, y ta specula cu kizas e lo por a wordo laga atras door di un artesano of kisas asta door di extraterrestre. „Mi ta kere cu e ta algo di un di e artistanan ‘newwave’. Of di un fan grandi di e film: “A Space Odyssey” un di e personanan a remarca, refiriendo na un escena di e film di aña 1968 den cual extraterrestrenan a laga obhetonan pisa atras.
Autoridadnan local tampoco tin un idea di unda e obheto aki ta bin pero lo bai investiga esaki mas leu. „Instalacion di un obheto di arte ariba tereno federal sin permiso, ta algo ilegal, no ta importa di cual planeta bo ta bin”, segun e autoridadnan a bisa BBC.
E lugar specifico di e obheto no a wordo divulga, pa preveni cu fanaticonan lo bai sali en busca di esaki. „Esaki ta e cos mas straño cu mi a encontra durante tur e añanan cu mi ta bulando”, segun e piloot di e helicopter.