Home Corte Agente di Polis condena pa fraude di rijbewijs

Agente di Polis condena pa fraude di rijbewijs

SHARE

ORANJESTAD – Awe mainta Hues a dicta sentencia di biaha den e caso penal contra e agente di Polis P. Native Aruba por a compronde cu e acusacionnan cu Fiscal a presenta contra P. ta cu na October 2019 el a falsifica documentonan di rijbewijs. Tambe e ta wordo acusa di a abusa di su posecion como ambtenaar. Durante tratamento di e caso P. a desmenti dilanti Hues di a falsifica documentonan. P. a splica cu 4 persona a pasa examen di rijbewijs digital malo. Door cu nan a pasa e examen malo dia 20 October 2019, nan a yama si nan por haya un chens mas pronto posibel pasobra nan lo tin cu bay exterior. P. a dicidi di laga nan, hunto cu otro personanan haya un otro examen dia 26 October 2019 cual tabata riba un diasabra. Esaki no tabata digital. A haci teoria y practica. Segun P., e personanan a pasa e examen cu exito. El a bisa cu tur tabatin rijbewijs Venezolano y mester a pasa examen pa haya rijbewijs. Segun P. door di slordig, el a haci un fout den e documento pa haya rijbewijs. Hues a señala cu P. a yena den e documento cu nan a pasa e examen cu exito siendo cu e ta un di dos examen. Hues a remarca cu na Polis, P. a bisa cu el a haci asina pa no lanta stof serca coleganan. El a bisa cu P. a firma documentonan cu e sa cu no tabata bon. Ora dos di e personanan aki a bay busca nan rijbewijs riba 30 October 2019, un agente di Polis cu tambe a yuda pasa examen riba 22 October 2019 a reconoce e personanan kendenan no a pasa e examen e dia ey. Nan a wordo deteni y durante interogacion nan a declara cu nan no a pasa ningun examen di teoria y practica serca P. y cu P. a yena e documento pa nan haya rijbewijs. Ta asina cu P. ta suspendi. El a bisa cu actualmente e ta hayando tratamento di psychiater, door cu e caso aki a pone bira hopi depresivo y no ta drumi bon. Fiscal a bisa cu e caso aki ta hopi serio caminda P. a abusa di su funcion como agente di Polis y encarga cu e maneho di dunamento di examen di rijbewijs. No a sali na cla kico tabata e motibo cu P. a haci esaki. No tin prueba cu el a haya placa pues no por papia di corupcion. Pa cu e castigo, Fiscal a bisa cu e ta tene cuenta cu P. a traha hopi tempo como Polis y tambe cu actualmente ta hayando tratamento di psychiater pa depression. Fiscal a remarca cu un agente di Polis ta huramenta pa haci su trabou manera ley ta prescribi. E ta haya cu P. a causa desconfianza. A duna 4 persona rijbewijs siendo cu nan no ta cualifica pa haya rijbewijs. Kico lo pasa si e hendenan aki a causa un accidente. Fiscal a tene cuenta ta promer biaha cu P. ta cay sera y si e haya castigo di prison, e lo perde su trabao. El a exigi trabou comunitario di 240 ora of 120 dia sera. Tambe Fiscal a exigi 6 luna di prison condicional cu 3 aña di prueba. Hues, despues di a scucha defensa di abogado, a sera tratamento di e caso y a bisa cu e ta dicta sentencia di biaha. Hues ta haya tur dos acusacion legalmente proba. E ta haya cu P. a falsifica documentonan di examen. Na opinion di Hues, e hendenan no a pasa examen. E ta haya cu P. a abusa di su funcion como Polis encarga cu pasamento di examen di rijbewijs. Hues a bisa cu e ta haya e castigo exigi Fiscal hopi suave y cu P. no ta duna claridad di e caso. El a tene na cuenta cu P. a wordo afecta door di media y cu e ta bou tratamento. Hues a bisa cu hopi duda e ta confirma e exigencia di Fiscal. Hues a condena P. na trabou comunitario di 240 ora of 120 dia sera. Tambe 6 luna di prison condicional cu 3 aña di prueba.