Tanki Leendert – Dialuna anochi manera nos a trece dilanti caba un atraco arma a tuma luga na Rooi Kochi, pariba di brug. E atracadornan a huy den un Chevrolet Aveo, unda cu na altura di Rotonde di Paradera un patruya atento a spotnan y a cuminsa un persecusion.
Esaki a termina momento cu e atracadornan a logra baha di e auto altura di e dam na Modanza y desaparece den e scuridad, pa no wordo haya mas pa autoridadnan.
Polis a usa hopi mankracht y te hasta helicopter, pero envano. E atracadornan a logra desaparece den fraccion di seconde. Basta rato despues, un informacion a drenta di un hoben bisti posiblemente mesun manera cu un di e atracadonan. Pero, esaki tawata te na altura di Tanki Leendert 2A, un caya banda di Kamerlingh Onnesstraat.
Mesora varios unidad policial a dirigi nan mes pa e sitio cu ta hopi pazuid di Cas Casuela. Patrouille di Playa a topa cu un hoben cu su tas chikito. Agentenan a baha y a bay ariba e hoben, poniendo e contra muraya, mientras e di dos agente tawata tin su arma reglamentario gemik ariba dje.
E hoben cu sigur tawata basta confundi y spanta na su turno tawata puntra nan ta kiko a pasa, pero e agentenan cu tawata bou di un stress buscando dos atracador den Sero Patrishi kizas no tawata worry cu e preguntanan di e hoben.
Dado momento a vloer e hoben, mientras mas polis a yega. E hoben a wordo poni cara abou riba un tera poco muha di yobida. Por a scucha bastante gritamento, manera “con bo yama, unda bo ta biba, con bo fam ta!?”
E hoben a bisa e agente den un manera toch respetuoso: “meneer conocemi”, pero asina mes e hoben a keda ariba vloer pa algun minuut. Na final a resulta cu e hoben no tawata tin nada di haci cu e atraco, y no tawata sa mes kiko ta pasando.
Polisnan a bise pa e cana bay su cas, pero e hoben a desaproba e manera cu e la wordo trata, esta inhustamente. Despues di e susto y trato cu e a haya, unda arma a wordo punta den su direccion y cu e mester a drumi den tera, e hoben obviamente no a keda contento. Mientras e tawata canando, e a bisa cu “polis tin cu wak bon con nan ta traha, nan ta traha k.k…”.
Pa e hoben su sorpresa e agentenan a baha bek for di nan auto, y un di e oficialnan a grita e hoben. Un di e oficialnan cu a baha bay riba e hoben a bisa algun cosnan manera : “bisa locual bo kier bisa awor, awor cu mi ta aki bisa locual bo tin di bisa, no haci co’i mar.co papia den djente…”. Pues un interaccion no mucho necesario y mucho menos profesional.
Pues asina nos por mira cu e hoben aki te na Tanki Leendert a pasa un experiencia bastante traumatico, durante cu autoridadnan tawata busca dos atracador cu a baha di auto y drenta mondi altura di e dam di Modanza. Nos por yama esaki “Wrong place wrong time” ?. Esaki sigur lo keda un memoria amargo y traumatico pa e hoben.