ORANJESTAD, Aruba: E ekipo di futbol afilia na Arubaanse Voetbal Bond (AVB) a dal un paso den bon direccion, desaroyando como organisacion y awor a logra inaugura nan luznan nobo. P’esaki AVB ta hopi contento y orguyoso.
E ta un proceso cu presidente di AVB, ing. Richard Dijkhoff, a sigui hopi di cerca. Esaki ta debi cu na momento SV United a acerca e federacion pa un contribucion n’e proyecto aki, no ta sin mas por haci esey. AVB a tuma contacto cu CONCACAF y splica con e organisacion a desaroya, kico tur nan ta haci y ta creciendo. Tambe a splica kico ta intencion di e organisacion y ta pa e motibonan aki CONCACAF a bay di acuerdo cu ta sostene e club pa logra nan soño. Tur esakinan ta basa ariba e bon contacto cu ing. Richard Dijkhoff, President di AVB tin cu Concacaf. Esaki ta ilustra e confiansa cu e co-federacion tin den e president di AVB y un biaha mas ta keda demostra cu nan ta dispuesto pa yuda unda cu tin mester.
“Ta hendenan cu mi conoce pa basta añanan caba, ta hendenan cu mi ta considera como dirigentenan hopi dinamico y cu un passion grandi pa nan organisacion y pa e deporte di futbol. Mi a mira con duro y organisa e bestuur ta traha,” asina ing. Richard Dijkhoff a express durante e ceremonia di inauguracion di e luznan. Un ehempel ta e actividad di fli cu nan ta organisa tur aña pa asina recauda fondonan pa asina un dia por cumpli cu nan metanan. Awe en todo caso un di e metanan a keda cumpli y esey ta di elogia.
SV United ta un organisacion cu a crece y bira grandi den 10 aña. Awendia nan ta militando den divicion di honor. AVB ta felicita e organisacion completo, tanto e directiva, presidente, entrenadonan, hungadonan, miembronan di organisacion pasobra tur esaki ta logronan importante.
Segun ing. Richard Dijkhoff, esaki ta un paso p’e organisacion crece, awe a pone luz despues ta turf, cura y prome cu realisa, nan lo tin un stadion!
