Home International FBI ta bisa cu Iran y Rusia tin informacion di votadornan Mericano

FBI ta bisa cu Iran y Rusia tin informacion di votadornan Mericano

SHARE

 

Oficialnan di seguridad nacional di Estados Unidos ta bisa cu Iran ta responsabel pa manda menasa via e-mail pa votadornan democratico en coneccion cu eleccionnan presidencial di otro luna.

E e-mailnan aki ta bin for di un grupo pro-Trump cu e intencion pa provoca intrankilidad, e Director di Inteligencia Nacional, John Ratcliffe, a bisa.

Ratcliffe a bisa tambe, cu oficialnan Estado Unidense a descubri cu Iran y Rusia a obtene algun informacion for di e registro di votadornan.

Tanto Iran como Rusia a nenga e acusacionnan aki, cu ta bisa cu nan ta bezig ta interferi den eleccion Mericano.

“Iran a declara na e embahador Suizo, kende ta representa interesnan Estado Unidense na Tehran, di ta nenga categoricamente e acusacionnan falso treci padilanti door di oficialnan Mericano,” e vocero di ministerio di asuntonan exterior di Iran a bisa. “Manera nos a bisa anteriormente, pa Iran no ta haci ningun diferencia ken gana eleccion na Merca.” El a agrega.

Dmitry Peskov, vocero di Kremlin a bisa na BBC: “Nos ta haya esaki lamentable. E acusacionnan aki ta keda bin tur dia, nan ta completamente sin base, nan tur ta basa ariba nada. Nan ta parce di ta parti di un proceso politico interno conecta cu e eleccionnan venidero.”

Ratcliffe su decision pa tene un briefing asina cerca di e eleccion presidencial ta wordo mira como un señal di preocupacion di gobierno pa interferencia internacional y campañanan pa malinforma e votadornan.

E hefe di inteligencia a bisa cu Iran su “spoof emails” ta sospecha di a wordo manda door di e grupo Proud Boys pa intimida votadornan, ocasiona intrankilidad y daña Presidente Donald Trump.

El a agrega, cu e informacion obteni di e votadornan lo por wordo uza pa purba manda mensahenan falso pa votadornan registra, cu e speranza di causa confusion y caos y debilita e confianza den e democracia Americano”.

Ratcliffe a bisa cu ainda no a descubri accionnan asina diparti di Rusia, pero cu nan ta na altura cu Rusia tambe tin cierto informacion di votadornan.

Den hopi estado Mericano, informacion di votadornan ta obtenibel, pero cada estado tin diferente reglanan tocante ken por pidi e informacion aki, ki tipo di informacion ta disponibel y con e informacion aki mag di wordo uza, segun legislacion di National Conference of State.

“Si bo ricibi un e-mail intimidante of manipulativo den bo inbox, no spanta y no sigui compartie,”  Ratcliffe a bisa, y a cualifica e accionnan pa influencia votadornan Mericano como “intentonan di advesarionan desespera.”