ORANJESTAD: Banco di Caribe ta lansa su tarheta di debito nobo. E vision di Banco di Caribe ta pa ofrece clientenan un banco di futuro y awe, esey ta keda confirma cu introduccion di e tarheta di debito Mastercard. E tarheta aki no ta simplemente uno mas, sino uno cu ta conta cu sosten di e plataforma di Mastercard y di Maestro pa e cliente por haci diferente tipo di transaccion uzando e fondonan cu e tin riba su cuenta coriente. E tarheta di debito nobo tin e opcion pa haci transaccion pasando e tarheta na un distancia cortico estilo ‘Tap-and-Go’ na un mashin di pago. Ademas, e ta conta cu un diseño moderno, ya cu contrario na e tarheta tradicional e ta vertical!
E tarheta di debito moderno:
E tarheta di debito Mastercard tin un color oraño y un diseño vertical. E ta reemplasa e tarheta di debito actual di Banco di Caribe y tin hopi mas beneficio. Pa e cliente por disfruta di nan, e mester activa e tarheta prome. E cliente ta haya un splicacion di e procedemento den e pakete di informacion cu e lo ricibi hunto cu su tarheta nobo. Con pa haci esaki nos a splica den un carta cu e cliente lo ricibi hunto cu e tarheta di debito nobo.
E tarheta di debito Mastercard tin aceptacion mundial. Aparte cu e tarheta ta funciona riba e plataforma di Mastercard, Banco di Caribe su tarheta di debito nobo lo sigui funciona optimalmente riba e plataforma di Maestro. Ademas, e ta bini cu facilidad di pago online cu ta duna e cliente e posibilidad pa cumpra ‘online’ via ‘webshop’ uzando e fondonan cu e tin riba su cuenta coriente.
Un facilidad di pago mas cu e tarheta di debito Mastercard tin ta ‘Tap and Go’. Na momento cu e mashin di pago y un tarheta ta ekipa cu e tecnologia di ‘near field communication’ (NFC), no mester introduci e tarheta mas den e mashin, sino djis pone (‘Tap’) na e pantaya pa haci un transaccion. Otro caracteristicanan existente cu lo keda vigente cu e tarheta nobo ta e opcion pa paga cu chip, cambio di PIN na cualkier ATM di Banco di Caribe y servicio di ‘SMS Alert’.
Distribucion di e tarheta di debito nobo
Clientenan di Banco di Caribe lo ricibi e tarheta di debito Mastercard nobo via post na e adres cu ta registra na banco. Ta p’esey ta importante pa bo datonan ta corecto y actual. E distribucion di e tarheta di debito nobo ta bay den fase cuminsando e siman aki. E cliente cu ultimamente a aplica pa un tarheta di debito, lo ricibi un yamada di un representante di banco pa por pasa busca e tarheta nobo. Pa mas informacion por consulta e seccion di pregunta y contesta rapido riba www.bancodicaribe.com. Ademas, por yama 523 2250 pa tur detaye relaciona cu Banco di Caribe su tarheta di debito nobo. Ta invita tur cliente pa keda pendiente pa mas informacion cu Banco di Caribe lo duna durante di e proximo temporada.