Home Politics ROSALINDA BOEKHOUDT (CURPA): TA BIRA TEMPO PA SECTOR HOTELERO TAMBE YUDA...

ROSALINDA BOEKHOUDT (CURPA): TA BIRA TEMPO PA SECTOR HOTELERO TAMBE YUDA PA SALBA BIDA

SHARE

Naturalmente mayoria di nos tin sintimiento humano cu ta haci cu nos lo kier yuda esnan den necesidad cu ta procedente di otro paisnan. Pero promer cu bo bay yuda bo mester wak si e infrastructura di bo pais por carga mas immigracion. Lamentablemente niun gobierno no a paga atencion riba esaki y a keda permiti immigracion descontrola y esey a haci cu awendia, banda di e destruccion di naturaleza pa traha mas vivienda, e capacidad di e hospital keda mucho chiquito pa por cumpli cu tur e necesidadnan di e poblacion.

Si tin algo cu e crisis a mustra ta ki consequencia lamentable desicionan asina por tin mirando cu awor hendenan pa falta di tratamento medico a fayece na cas y yen di caso di negligencia medico.
E pasado sinembargo ta pa siña foi dje so. Cual ta crucial awor ta pa evita cu e caso postivonan sigui escala y mas bida bay perdi. Den nos opinion awor ya tin demasiado caso positivo pa sinta controla si tur esnan cu mester ta isola y den cuarentena ta keda den isolacion of den cuarentena. Segun cifra di departamento di salubridad publico (DESPA) tin ongeveer 3000 caso positivo caba y si nos sali foi punta di bista cu ta biba 4 hende cu a test positivo na cada cas tin mas of menos 750 cas pa pasa pa controla, cual no por wordu controla 24 ora tampoco. Segun e cifra di DESPA tin un promedio di 100 caso nobo positivo, esey lo kermen cu si nos poblacion ta consisti di 150 mil hende cu e grado di infeccion ki sigui cu mas a menos 50 mil hende (1/3 parti) lo contagia cu COVID den 1,4 aña di cual 250 (0,5%) lo fayece na COVID so sin conta tur esnan cu lo fayece pa falta di atencion medico. Banda di perdida di bidanan precioso y gasto pa hospitaal esaki lo tin consequencia financiero pa entierro pa hopi famia cu ya caba. Sera frontera tampoco lo ta un opcion ya cu lo no por permiti cu e economia wordu afecta mas y mirando e hecho cu no lo yuda e grado di contagio baha ya cu e mayoria di caso positivo ta bou di e localnan. Pa evita perdida di bidanan precioso y gasto addicional nos ta kere cu lo ta mas efectivo pa gobierno a base di e Ley di Calamidad pidi e sector hotelero pa pone 1 of mas hotel disponibel y pone esnan cu a test positivo sin simptoma of simptoma leve aden y pone 1 security na porta central unda cu e famia na un manera ordena por laga cuminda pa cada familiar pa 15 dia den e lobby.
Den nos opinion e sector hotelero tambe tin cu yuda salba bida den e crisis ki. Es mas nos ta di opinion cu despues cu e comunidad arubano a permiti e sector ki pa decadas pa haci negoshi hopi rentabel awor lo cumpli cu un obligacion moral pa e tambe duna algo bek na e comunidad di Aruba. E balor cu cu Mark Ghoulston a papia di dje ora ela bisa cu rikeza ta cual bo ta coy foi mundo pero cu e balor ta cual bo ta duna bek. Ademas e sector aki lo beneficia si e grado di contagio baha pasobra esaki lo haci Aruba mas atractivo pa turista atrobe. Mescos cu ya a fumiga e edificionan den e otro sectornan lo por fumiga hotelnan tambe pues esey no lo mester ta un problema tampoco.
Nos tambe ta tata, mama y ruman y mas cu claro nos tambe a keda den shock y tristeza ora a ruma nota di cual a socede. Pues na e familiarnan di tur esnan cu a fayece pa falta di atencion medico nos kier a extende extende nos mas sincero y profundo condolencia. Cu Dios duna boso hopi forza.