Home Corte Fiscal ta exigi 5 aña di prison pa homber cu ta secuestra...

Fiscal ta exigi 5 aña di prison pa homber cu ta secuestra amiga y forza pa transferi mas cu 15 mil dollar p’e

SHARE

ORANJESTAD – Corte di Husticia a trata e caso penal cu Ministerio Publico a cuminsa contra e homber J.G.M. Aruba Native por a compronde cu Fiscal a exigi 5 aña di prison pa e homber Venezolano J.G.M., kende a secuestra su amiga, forza e amiga cu un arma pa transferi mas cu 15 mil dollar riba un cuenta. E sospechoso ta bisa cu e no ta corda nada cu a sosode.

Tratamento di e caso aki a sosode via video conference pa motibo di e pandemia di Corona Virus. E sospechoso J.G.M. tabata na KIA den un oficina y den sala di Corte tabata Hues, Fiscal y e abogado. E acusacion cu Fiscal a presenta contra J.G.M. ta cu entre e anochi di 3 y 4 di November 2019, el a secuestra e dama N. den N. su mesun apartamento na Jaburibari. Ademas, via video call el a forza e famia di N. pa paga 30 y 15 mil dollar. Tambe Fiscal ta acusa J.G.M. di a forza e dama N. paga 1400 florin. Fiscal ta acusa J.G.M. di posecion di un arma di candela cu bala.

Hues a puntra J.G.M. si e acusacionnan ta berdad. Ta asina cu J.G.M. ta bisa cu e no ta corda nada di loke a sosode. Hues a bisa cu tin tres persona cu a haci keho: e dama N., e hombernan A. y S. Ta asina cu N. a yama nan via video call y cu J.G.M. tabatin arma poni riba N. y tabata exigi 15 mil dollar y despues 7500 dollar. J.G.M. a bisa Hues cu e no ta corda nada. Hues a bisa cu e dama N. a bisa cu J.G.M. a bay na e apartamento y a exigi placa. N. a transferi 1400 florin na cuenta di ex amiga di J.G.M. Esaki tambe J.G.M. ta bisa cu e no ta corda.

N. a bisa cu despues di hopi papia a logra calma J.G.M. pa pone e pistol riba lock. Despues nan a tene relacion sexual y a bay drumi. Mainta e team di aresto a detene J.G.M. na e apartamento despues cu A. y S. den oranan di marduga a bay haci denuncia na Polis.

Ta asina cu J.G.M. tabata cu un amiga Y. pero a distancia y e tabata den relacion cu N. Asina mes J.G.M. y Y. tabatin contact cu otro. E dia 3 November 2019 mes el a topa cu e dama. E tabatin un otro auto cual el a huur for di un dama pa 3 dia. Polis ta  sospecha cu dia 2 November 2019, J.G.M. a bende e auto y cumpra e arma. El a bay na N. pa haya placa pa e bay Hulanda pa asina caba cu e relacion cu N. J.G.M. lo a bisa N. cu e mester paga pa e sufrimento cu el a laga J.G.M.  pasa aden.

N. ta demanda danjo material algo mas di 2025 florin pa tratamento di psycologo. Segun N., J.G.M. no kier acepta cu e relacion a caba y pesey a secuestr’e y menace cu arma. E tabata spanta. E representante di N., e dama W., a bisa Hues cu N. tabata hopi social pero awor el a cambia. N. no ta e mesun N. cu e conoce. Ta duel’e cu un persona asina social, a sera su curpa. W. a expresa cu e ta lamenta cu algo asina ta sosode ariba Aruba cu semper tabata safe. Spera cu despues di castigo, J.G.M. lo no keda Aruba mas.

Fiscal a bisa cu e ta haya legalmente proba e acusacionnan. E relacion a cuminsa na 2018 y a kibra door di jaloersi. E sospechoso a rabia door di esaki. Dia 3 November 2019, J.G.M. a bay na e apartamento y N. a lag’e drenta. Unavez paden, J.G.M. a saca pistol p’e. Esaki tabata mas o menos 9’or di anochi y ta te 3.15 di marduga, Polis na Oranjestad ta wordo notifica door di famia di N. Fiscal a splica con hopi esfuerzo a haci di parti di Polis pa a logra bay na e cas y detene J.G.M. sin cu a causa daño na e victima N. cu tabata secuestra. E pregunta ta si J.G.M. ta culpable of no. Esaki ta un pregunta central den e caso aki. Tanto psycologo y psychiater a investiga J.G.M.

Psycologo ta haya cu J.G.M. ta sufri di problema mental y cu e no ta responsabel pa su actonan. Fiscal no ta satisfecho cu e investigacion. El a mustra cu ta un biaha so psycologo a papia cu J.G.M. Segun Fiscal, mester tabatin mas investigacion pa determina kico realmente a pasa cu J.G.M. Pesey Fiscal a dicidi di laga psychiater evalua J.G.M.

Fiscal ta tuma J.G.M. na malo pa tur loke el a haci. El a tene cuenta cu ta promer biaha cu J.G.M. ta cay den man di husticia.  Fiscal a exigi 5 anja di prison, kitando e tempo cu J.G.M. ta sera. Tambe Fiscal ta haya cu mester aproba e demanda di daño di N.

Hues a bisa cu e ta bay studia e caso y dia 18 September 2020 lo tin sentencia.