Home Politics Robert Candelaria (AVP): Ta un honor pa mira e proyecto “traplift” na...

Robert Candelaria (AVP): Ta un honor pa mira e proyecto “traplift” na Stadhuis bira un realidad

SHARE

E prome deseo a bira un realidad…pa tur hende cu limitacion. Desde awo en adelante tur hende, sin excepcion, tin acceso na ceremonianan cu ta tuma luga na Stadhuis. Den presencia di invitadonan, e studiante di 15 aña Jeandre Henriquez a representa tur persona cu limitacion y a inaugura oficialmente e “Traplift” na edificio monumental di Stadhuis. Ta gradici tur cu a yega hunto pa haci e proyecto aki posibel, ta un derecho di tur pa por ta inclui y tin acceso na luganan importante di nos pais.

Parlamentario Robert Candelaria cu ta un di e promotornan den e lucha pa inclusion di tur persona cu limitacion riba nos isla. El a comparti e sentimento di alegria di mira e prome di hopi otro proyectonan realisa. Desde inicio cu a drenta den comunicacion cu diferente fundacion entre otro Funari e pregunta tabata, si tin luga nan cu kier pa bira accesibel pa personanan den rolstoel of cu limitacion. A pidi pa duna top 5, e contesta tabata e top 1 ta “Stadhuis”. Y awe esaki ta un realidad.

Candelaria ta conta cu na momento cu el a drenta parlamento, su amigo Jos Solognier, den feliz memoria, a acerc’e cu peticion di yudansa pa cu parkeerkaart pa hendenan cu limitacion. Un proyecto cu ta canando su caminda y di cual su lucha tambe ta te final. Por lo pronto e ta na Cuerpo Policial y ta spera cu e trayectoria termina pronto. E deseo ta pa e yiu muhe di Jos bira e prome persona pa ricibi e Parkeerkaart aki como gesto di aprecio pa inicia e lucha aki y tambe duna Ministerio Publico y Polis e herment pa duna multa pero tambe crea mas consientisacion den comunidad y reenforsa e respet cu cada persona cu limitacion merece.

Hopi ta esunnan cu tabata desea di forma parti di e bunita ceremonia di matrimonio den Stadhuis pero pa motibo di accesibilidad no tabata posibel, y ta sumamente contento cu awe por mira hunto cu Monumenten Fonds, Monumenten Bureau, Censo, Funari y Plataforma pa Hendenan cu Limitacion mira realisacion di e proyecto aki.

Robert Candelaria ta boga, cu inauguracion di e “traplift” aki na Stadhuis bira un estimulo na otro edificionan pa tene cuenta cu personanan cu limitacion. E proyecto na Stadhuis ta marca como uno simbolico, pa hopi famia riba nos isla uno importante pero tambe pa stimula otronan haci mescos. Despues di un aña cu a manda e peticion, a haya e permisonan y cu awe por realisa e apertura oficial.

Anne Witsenburg-de Jong di Monumenten Fonds Aruba ta conta cu e lucha aki tabata largo mirando cu tin hopi regla cu mester tene nan mes cu ne na momento cu ta trata edificionan monumental. Den combersacion cu Plataforma pa Hendenan cu Limitacion por a sinti cu e deseo aki keto bay ta esun di mas grandi pa hendenan cu limitacion pa por tin acceso na Stadhuis y pa e motibo ey a busca tur caminda incansablemente pa por logra haya e lift ideal. Despues di lucha y perseverancia awor a inaugura e traplift aki y asina brinda e oportunidad na un y tur e acceso.

Lila Mackay, Presidente di Plataforma di Hendenan cu Limitacion, a conta cu nan lucha no solamente pa hendenan di limitacion fisico pero nan ta representa diferente fundacion cu ta trata cu hendenan cu limitacion di tur tipo (motorico, intelectual, visual, auditivo) cu a bin hunto pa para pa derecho, igualdad y accesibilidad. Stadhuis cu tabata peticion awe a bira realidad y cu por a inaugura e lift treciendo alegria den e comunidad. Un logro cumpli y asina lo sigui lucha pa demas proyectonan na caminda.