Home History of Aruba Historia di Aruba: Robo a termina den un asesinato, un homber di...

Historia di Aruba: Robo a termina den un asesinato, un homber di edad a wordo cruelmente asesina

SHARE

Aruba, mescos cu tur otro parti di mundo tambe tabata tin un historia di algun crimen basta pisa, den pasado tabata tin varios robonan grandi, atraconan arma, varios asesinato, secuestro, crimennan pasional, violacion etc etc. Nos isla no tabata semper un isla keto y felis, a pasa varios sucedido serio, cu a laga henter e pueblo di Aruba den shock,no ta tur ta documenta, pero si compare cu otro paisnan toch Aruba tabata hopi mas sigur compara cu otro paisnan den region.

E biaha aki nos lo dedica historia di Aruba, na un crimen, un robo cu a caba cu asesinato, dos hoben a asesina un homber di 71 aña, den un forma hopi cruel djis pa a horta placa for di e homber, un suma di entre 500 pa 700 florin.

Manera ta custumber nos lo uza nombernan fictioso, nos no lo menciona e nombernan original.

Diamars, 10 di September 1976, den careda di 7’or y mey di mainta a drenta un informacion cerca polis, cu riba un caminda di santo na Barcadera lo tin un hende morto den un auto. Mesora a manda un patruya di polis na e sitio y enberdad e polisnan a bin topa cu e auto staciona riba caminda.

E agentenan policial a baha for di auto y a bay mira kiko lo por a sosode. Den e auto enberdad nan a topa cu un curpa sin bida di un homber, mita curpa tabata den e auto y otro mita tabata colga pafo di e auto na e banda di pasahero, unda e porta di auto tabata habri. Polisnan na e sitio a nota cu e persona aki lo a wordo cruelmente asesina, su cabes a wordo maltrata cu un baranca cu a wordo haya net banda di e auto. Un rato despues nan a bin compronde cu tabata trata di E.H. di 71 aña kende tabata biba pariba di brug. E homber tabata traha na e pomp di gasolin di Shell na Santa Cruz. Polis na e momento ey no tabata sa cuanto ora e tabata tin morto caba na e sitio.

Den careda di 6 or y mey di mainta, un persona lo a bay pasa eybanda y a bin topa cu e curpa sin bida di E. H. den e auto, e persona aki ta esun cu a avisa polis.

Tur cos a cuminsa na momento cu dos homber hoben, (nos lo yamanan Pablo (25) y Romulo (23) ambos di Santa Cruz, aparentemente e tempo ey nan no lo tabata tin nada di haci y tabata kier a haya poco placa sin mucho esfuerzo. Pablo y Romulo a cuminsa traha un plan cu un final horibel. Nan a mik riba un persona di edad E.H.cu e tempo ey tabata tin 71 aña y tabata traha na e pomp di gasolin di Shell na Santa Cruz. E pomp di gasolin tabata keda pabou di Titichi, awendia dilanti Mundo Nobo, den curason di Santa Cruz. E.H. tabata tin su edad, pero tabata sinti’e manera nan tabata bisa den bario di Santa Cruz, un Mo Chai. E.H. tabata un homber trahador y di hopi confiansa pa su doñonan di trabou. Aparentemente e lo tabata un bon trahado y ora e caba di traha, e tabata conta  e cent y tabata bay cu full e benta di dia cas.

Pablo y Romulo a bay cu un plan macabro cerca E.H., nan a traha un plan cu na prome instante a cay den bon tera cerca e bieu. E pober di a cay den nan trampa. Romulo cu Pablo a bay gaña E.H. cu nan tin un galiña (un mucha muhe) p’e y cu e mucha a pasa mir’e caba. E.H. tabata asina contento cu ainda cu su edad e ta haya atencion di muhe. E pober buen creyente aki a cera e negoshi trempan y tabata pura y hopi contento pa bay conoce e supuesto mucha muhe. E la lock e negoshi, a pasa man pa e benta di dia y a subi den auto cu e dos burdugonan.

Bou engaño e pober a bay cu e dosnan aki sin sa kiko tur nan tabata tin planea cu ne. Nan a bay cu ne direccion di Barcadera y den un hanchi di tera nan a para e auto. Nan a kita tur e placa cu e tabata tin for di dje, cual tabata encera e benta di dia, esaki lo tabata entre 500 pa 700 florin Antiyano. Despues nan a chok’e cu un waya di coriente, te ora e pober no tabata halando rosea mas. Prome cu nan a bandona e sitio, pa ta sigur cu nan a mat’e, Romulo lo a coy un manga (un baranca grandi) y a baha esaki riba cabes di e pober homber di 71 aña, cu na e momento ey ya no tabata duna mucho señal di bida mas. Sin un tiki arepentimento, e dos nan aki a bandona e sitio cu e cent, lagando e curpa sin bida di E.H. benta mita den auto y mita pafo di e auto cu e porta habri.

Mesora despues di e asesinato Pablo a bay sconde cerca un bon amigo na Corsou, e otro si lo a keda Aruba.

Despues cu autoridad a descubri e curpa di E.H., e recherchenan asigna pa atende cu e caso aki, a dicidi di traha cu cuerpo y alma pa soluciona e asesinato tristo y cruel aki. Hopi lihe detencion a cuminsa cay, e mesun siman polis a detene dos persona un Muher di  54 aña y su yiu homber di 33 aña. Mirando cu e muhe lo tabata tin un relacion pa basta tempo cu E.H. Despues di e prome detencionnan aki, recherche no stop, pero a sigui investiga y algun dia despues nan a bolbe detene un persona mas.
Na momento cu Polis a detene e di tres sospechoso, toch no a stop y a sigui investiga, paso nan no tabata convenci cu un di e tres sospechoso ney tabata e asesino. E recherchenan tabata traha duro riba e caso aki y nan tabata pasa puntra rond ken por a mira algo of ken por sa cu ken E.H. a bandona e pomp di gasolin.

Riba un bon dia un persona a bisa e recherchenan cu e anochi ey e la mira E.H. sali for di e pomp station cu e dos hombernan aki den su auto. Mesora e recherchenan a cuminsa move pa detene Romulo y tambe pa detene Pablo. Pablo na e momento ey no tabata na Aruba, ainda e tabata na Corsou y tabata keda cerca un bon amigo. Pablo tur dia tabata cumpra corant y tabata comenta tocante e asesinato di E.H.” cu ainda nan no a gara e asesino di e trahador di Shell na Santa Cruz” sin bisa su amigo cu ta su persona tabata un di e burdugo nan. E pober amigo sin sa cu Pablo tabata un asesino, cu confiansa a tene na su cas y tabata dun’e di come y lugar pa e drumi.

Riba 21 di September 1976, den oranan di mainta polis a logra detene Romulo na Aruba y Pablo na Korsou, e la wordo mande di biaha pa Aruba. Mientras tanto e otro tres sospechosonan tambe a keda deteni, esaki tanten cu investigacion tabata andando. E caso a cera dia cu e dos hobennan aki Pablo di 25 aña y Romulo di 23 aña a keda sentencia.  Fiscal a pidi 20 aña di castigo di prison pa ambos, pero Hues na final a dicidi di dunanan 15 aña di castigo di prison. Segun nos a compronde nan a sinta un castigo di prison di 12 pa 13 aña.

E articulo aki no ta bay pa husga niun hende, nos no conoce ni e victima y ni e asesinonan, pero nos tin entendi for di esnan cu si conocenan, cu nan lo a sinta entre 12 cu 13 aña castigo di prison. Tambe segun nos a compronde esun cu nos a yama Pablo, despues cu e la recobra su libertad, e lo a cay den wega di droga y a bay biba riba caya, pero a fayece algun aña atras.  E otro cu nos a yama Romulo, si a arepenti di loke e la haci, e la drecha su bida, a casa y segun nos a compronde lo a forma un bida.

Fuente: Amigoe y anonimo