Awe mainta den conferencia di prensa di partido AVP lider di fraccion Marlon Sneek a comunica riba e situacion na aeropuerto di Aruba caminda un gran cantidad di hende lo bay perde nan trabou na AAA.
Fraccion di AVP a haci pregunta riba e situacion aki den un carta dirigi na Minister Dangui Oduber, aunke ta custumbra cu e Minister aki no ta duna contesta. Igual na e carta anterior caminda a cuestiona e terminonan cu a duna pa por a bira e broker cu ta atende seguro pa e turistanan cu ta bin Aruba y te dia di awe no por a conteta.
Un negoshi cu ta premira di bay gana sumanan substancial cu ne, no por ta un negoshi cu ta duna for di bo man, mas bien ta un escogencia cu ta pasa den un proceso caminda tur hende por participa y esun cu duna e miho oferta esey lo haya e deal. Minister Dangui Oduber den e caso aki no a haci esaki, e mes a escohe adelanta un broker pa dun’e e oportunidad di bay gana placa. Condenabel!
Compania cu ta sostene su mes via Loonsubsidie
Marlon Sneek ta menciona e echo cu AAA, un compania cu awe ta haci uso di loonsubsidie ( no via reserva ). E trahadonan caba ta dunando di nan parti mirando cu ta den loonsubsidie nan ta draai, a para banda di e compania y acepta di haya menos entrada pa nan keda cu nan trabou. Un compania cu a book un ganashi aña anterior di riba 35 miyon florin anto awo akinan cu pais a cuminsa draai ta mandando hende cas? Un compania cu ta e prome pa draai bek mirando cu ta e prome luga di yegada di turistanan.
Kico ta pasando den e compania aki cu kier manda trahado cas
Parlamentario Sneek ta cuestiona e echo aki y ta puntra kico ta pasando den e compania. Ta e mes un compania cu den un forma straña a cera un “deal” pa un fiansa di 500 miyon florin. Anto awe trahadonan tin cu bay sufri bou di esaki.
Un compania nacional , caminda gobierno tin e 100% share di dje no ta cuida su propio trahadonan, no ta cuida e garantia di nan trabou. Segun Sneek e ta imposibel cu Gobierno awo akinan ta bay sconde y bin bisa ta un NV y cu nan lo haci locual cu nan mester haci. Awe ta bisa cu cos ta malo y tin cu manda trahadonan cas? Basa riba ki proyeccion a bay haci fiansa di 500 miyon anto? Ta pa ken gana % riba e fiansa aki a hacie anto ?
Pa partido AVP ta un sin fin di asuntonan dudoso, y como tal a haci pregunta na Minister encarga cu e compania cu ta Dangui Oduber pa asina haya claridad / pa trahadonan haya claridad mirando cu ta un cantidad di tata y mama pa mester pone pan riba mesa y awe nan trabou ta na peliger.
Marlon Sneek ta finalisa bisando cu ta spera cu no ta pasobra a bay haci un fiansa di 500 miyon y awe no tin placa ta bay corta den trahado pa paga fiansa. Como un compania solventiente ( solvent ) cu a pidi prestamo y haya esaki, no por compronde di unda ta bin awe diripiente cu mester manda trahadonan cas.
Ta spera cu e biaha aki si Minister Dangui Oduber bin dilanti y no keda sconde mane calco den e cocolishi y bin dilanti duna cara y bisa e trahadonan kico ta speranan. No bay sconde tras di director / board y como Minister cu ta duna e board di supervicion e liña y unda Gobierno ta bay cu su companianan estatal, den e caso aki AAA, sali y bisa kico ta pasando den e compania aki.