Kuerpo Polisial di Korsou ta informa: Morto den tráfiko.

Relashoná ku un aksidente di tráfiko grave ku a tuma lugá dia 7 di yüni último alrededor di 21.26’or riba Schottegatweg-Noord na altura di un establesimentu ku ta bende ‘por mayor’, e shofùr enbolbí den e aksidente a fayesé. Riba e fecha en kestion un hòmber ku tabata kondusí un vehíkulo riba e kaminda ariba menshoná, probablemente pa motibu di ekseso di velosidat, a pèrdè kontrol riba su stür. E vehíkulo a bòltu diferente bia i a konsekuensia di esaki e shofùr a resultá riba kaya. Den un situashon kritiko a transportá e shofùr pa sala di emergensia di C.M.C. Awe, djasabra 13 di yüni alrededor di 12.38’or, Sentral di Polis a risibí informashon, ku e víktima ku tabata enbolbí den e aksidente aki, a fayesé a konsekuensia di e múltiple leshonnan ku el a sufri. Polis ta dispone di identifikashon di e persona, pero no por duna esaki liber ainda, ya ku mester kaba di informá famia promé.