Diamars 26 di mei den parlamento Minister di Enseñansa Ciencia y Desaroyo Minister Rudy Lampe a bin duna informacion y Parlamento por a hasi pregunta tocante e situacion den enseñansa. Durante e reunion a haya e oportunidad pa trese tur e preocupacionnan cu tin andando y tambe duna oportunidad pa Minister por aclaria nan.
Importancia di nos Schoolmaatschappelijk werksters
Cada scol ta consisti di un team di diferente profesionalnan manera maestronan, werksternan, administratie, y schoolmaatschappelijke werksters (SMW’ers).
Actualmente tin 11 SMW’ers y 22 scol di Dienst Publieke Scholen (DPS). E cuido y atencion cu e SMW’ers ta brinda nos muchanan ta di suma importancia y na es momento e ta bayendo bon. Te hasta tin SMW’ers cu ta encarga cu mas cu 1 scol. Mi pregunta na minister tawata, kico lo pasa cu e SMW’er di Skol publico cu actualmente ta encarga cu diferente scol? Unda e SMW’er lo bay traha/ Ken lo ta e dunador di trabou di e SMW’er?
E ta hopi importante pa nos muchanan sigui ricibi e guia y sosten di e mesun SMW’er. Paso ya e mucha a crea un laso cu e persona aki, e ta confia e persona aki y ta sinti su mes comfortabel y sigur pa comparti su sentimentonan y pensamentonan cu e SMW’er aki. Hopi biaha muchanan ta confia unicamente e SMW’er ora di trata un tema delicado. Di otro banda, SMW’er ta brinda e mayornan tambe guia y sosten den e proceso di cria y lanta un yiu. Na banda di e muchanan y mayornan, maestronan tambe ta sinti un gran ayudo di tin un SMW’er den su team pa yuda guia e muchanan. Mayornan, maestronan y SMW’ers tur ta importante pa e mucha por bay bon na scol y sigura un futuro exitoso.
Conclusion
Den reunion a presenta mocionan y uno sigur cu mester remarca ta unda a urgi gobierno pa crea un plataforma nacional di dialogo entre gobierno y sector di educacion cu participacion di tur esnan envolvi pa logra consensus y union riba e tereno di enseñansa. Minister durante e reunion a menshona cu ta tuma e conseho di Parlemanto na serio pa hiba un bon comunicacion cu veld.
Nos tur ta di opinion cu enseñansa ta un sector hopi importante pa futuro di nos pais. E ta importante pa tur mucha tin e oportunidad di bay scol, pero aun mas importante ta pa tur mucha tin e oportunidad di siña. Pa un mucha por siña e no mester ta solamente inteligente, si no tambe tin trankilidad y stabilidad pa asina por duna tur di su banda na scol. Mirando cu e problemanan social/den famia na Aruba ta hopi, mi ta hay’e importante pa mantene e SMW’ers nan na e mesun scolnan y te hasta pone mas SMW’ers disponibel pa e bienestar di nos muchanan, nan trankilidad, nan futuro y futuro di nos pais.