Oranjestad – Diahuebs ultimo Minister Maduro a manda e plan pa yudansa na comercio den forma di subsidio di salario, pa su evaluacion door di CAFT y pa su decision den Conseho di Minister di Reino riba dia 1 di mei proximo. E meta di e plan ta pa ofrece yudansa na comercio pa nan por paga salario di nan trahadornan y asina evita cu un grupo di casi 37000 trahador keda desemplea.
Yudansa pa 37000 trahador
COVID19 ta afecta economia di Pais Aruba grandemente. Na promer instante a tene cuenta cu 25000 trahador lo por keda afecta directamente door di caida di entrada fo’i turismo. Ma e introduccion di e medida necesario di ‘Shelter in Place’ a trece cune cu 37000 trahador ta wordo afecta y por keda sin trabou. Pa yuda e 37000 mil trahadornan aki, Gobierno a haci e peticion na Conseho di Minister di Reino, pa Aruba por brinda yudansa di subsidio di 80% di salario bruto na comercio pa nan por paga y tene empleado na trabou.
Efecto di e subsidio di salario
Unabes cu Conseho di Minister di Reino bay di acuerdo cu e plan pa yudansa den forma di subsidio di salario, Gobierno lo por brinda e yudansa aki y por yuda tene 37000 trahador na trabou. Segun calculacion haci, 3317 compania lo por wordo yuda cu pago di salario di empleado. Door di mantene cupo di trabou, e pagonan di prima di AZV y SVB por sigui y asina pone cu e deficit premira den e dos fondonan aki lo ta menos. Banda di esaki, mas trahador cu pago ta significa menos desempleo y menos peticion pa FASE.
