Awe nos ta recorda e momento historico caminda na anja 2000 cuatro organisacion scout separa a bini hunto y despues di a delibera pa varios anja pa logra yega na diferente consensus pa unifica tur e gruponan aki bou di un organisacion nobo y asina e identidad Scouting Aruba a nace. Actualmente nos organisacion ta consisti di 12 grupo rond di Aruba cu un cantidad di mas di 500 miembro. Tanto mucha como hoben entre 5 pa 18 aña y lidernan adulto ta forma parti di nos organisacion.
E actividadnan scout o padvinderij ta uno bon conoci na Aruba ya pa 90 aña. Antes cu lasonan directo cu Antiyas o directamente afilia na organisacionnan religioso, awendia tur scout localmente ta miembro di un organisacion nacional cual ta conta cu afiliacion na e organisacion mundial di Scouting yama “WOSM” cu tin miembro riba practicamente tur pais na mundo; en total mas di 50 miyon miembro.
Scouting manera ta conoci ta e organisacion hubenil mas grandi na Aruba cu por medio di su metodo di educacion no formal basa riba nos ley y promesa scout ta educa mucha y hobennan pa bira cuidadano util y responsabel pa nos comunidad y cu capacidad pa ta nos lidernan di mayan den nan respectivo comunidad, trabou y bida.
Scouting ta logra esaki por medio di su programa interactivo caminda e hoben ta wordo presenta diferente desafio pa pasa door di dje y den e proceso e ta sinja conoce su mes mihor, e ta sinja desaroya su abilidadnan y conocemento y ta wordo forma como persona por medio di diferente areanan di crecemento como ser humano tanto fysico, caracter, creativo, afectivo, social y spiritual.
Pa motibo di e conocido crisis mundial cu grandemente a afecta Aruba tambe nos a keda impedi pa por a celebra nos di 20 aniversario y dia di San Jorge nos patrono manera nos tabatin planea pa haci cu nos miembrecia completo. Apesar di e situacion desventahoso cu nos ta encontra nos mes aden nos ta keda optimista. E educacion scout ta forma bo di tal manera cu bo mester por haci uzo hasta di adversidad pa busca oportunidadnan y solucionnan nobo pa nos organisacion cu e miras hasta pa mehoracion den futuro sercano. Awor ta e momento pa presenta ideanan nobo pa asina nos por re-ahusta y prepara mihor ainda. Asina cu e situacion actual bolbe restablece na e momento y manera apropia nos lo celebra nos 20 aniversario cu cada Bever, Welp, Verkenner, Explorer, Voortrekker y Lider miembro di nos organisacion.
Finalmente na nomber di nos liderazgo nacional nos kier a gradici tur miembro y mayor kendenan ta pone nan confiansa den scouting, tur nos lidernan voluntario kendenan ta nos pilarnan pa brinda e formacion educativo y na tur comisario pa nan aporte pa dirigi e organisacion aki cu awe nos por celebra e di 4 lustro di Scouting Aruba cu nos patrono y fundador fuertemente den mente.
Masha Masha Pabien na tur scout sea activo o cu a forma parti di nos organisacion den pasado.
Pa termina nos tin un ultimo palabra na tur Scouts. Keda activo cu bo grupo di amigonan y colega lidernan. Ban sostene otro y apoya otro den e momentonan distincto aki pa asina nos por surpasa e crisis y sali mas fuerte padilanti cu nunca.
Pasa un feliz dia di San Jorge celebrando nos di 20 aniversario. Sea orguyoso di ta scout.