Merca – Presidente Trump a publica un declaracion riba medionan social dunando e impresion cu e lo no ta bay duna conferencia di prensa. Casi tur anochi gobierno di Donald Trump tawata informando prensa y ciudadanonan Mericano riba e situacion di e pais enfrentando un pandemia di coronavirus.
Diasabra anochi e mandatario Mericano a cancela e press briefing cu tawata mester a wordo teni. Den un tweet e mesun anochi e ta bisa cu esaki “no ta bal e tempo ni esfuerso”
Aki por lesa e declaracion haci riba su Twitter account.
E tweet ta referi tocante e comentario cu Trump mes a haci den un conferencia teni diahuebs. Aki ta unda cu e a sugeri pa hende inyecta nan mes cu desinfectante (destina pa limpiesa di cas), pa asina yuda hende infecta cu e coronavirus haci nan ‘pulmon limpi’.
Despues di dos dia unda varios instancia mester a suplica e pueblo pa no sigui e conseho aki, Trump a bin na bisa cu e tawata solamente purbando di ta ‘sarcastico’ den su comentario.
E conferencia teni den e briefing di diabierna a dura menos cu 30 minuut, aki e presidente a nenga di tuma pregunta for di miembronan di prensa. E hechos nan aki ta sigur sumamente lamentabel, mirando e seriedad di e situacion.
E pais ta yegando 1 miyon caso di infeccion y tin caba mas cu 50 mil morto. Informacion oficial y guia pa e publico ta di suma importancia pa e lucha contra coronavirus.