Home Uncategorized Ecuador: Supuesto fayecido di COVID-19 ta wordo haya bibo den hospital

Ecuador: Supuesto fayecido di COVID-19 ta wordo haya bibo den hospital

SHARE

Guayaquil, Ecuador – Un dama Ecuatoriana di 74 aña, Sra. Alba Maruri, cu a wordo declara morto a causa di coronavirus a ser haya bibo. Mundialmente por bisa cu ta un caos a wordo crea pa e pandemia di coronavirus.

Tin hopi presion poni riba cuido medico. E cantidad di mortonan ta asina hopi cu esaki ta causando problema y eror ‘administrativo’. E pais Latino ta malamente afecta pa e pandemia. Ecuador conoce mas cu 22,000 caso registra di infeccion y tin 600 morto.

Den caso di e anciana di 74 aña, famia di Alba Maruri a wordo informa luna pasa cu e a fayece. E famia despues a wordo manda tambe shinishi di e curpa cu a wordo crema. Pero, diahuebs pasa a resulta cu Sr. Maruri a lanta di un coma cu e tawata aden pa 3 siman.

E señora a lanta y a pidi dokter pa yama su ruman muher. Momento cu e famia a ricibi e noticia aki nan tawata sumamente contento. Nan ta puntra nan mes si ta ken su shinishi nan a ricibi for di hospital.

Informacion for di prensa local ta splica cu e anciana a wordo interna den hospital luna pasa cu un keintura halto y problema di respiracion. Riba 27 di maart e famia a wordo informa cu e señora a fayece. Nan a wordo mustra un curpa pero den mortuario a wordo pidi pa tene distancia pa miedo di contagio.

E señora Maruri su sobrino, Jaime Morla, a bisa oficialnan di hospital cu e a kere esey ta su tanta. E a conta cu e tawata tin miedo di mira su cara.
E tawata para 1 meter leu pero a mira cu e fayecido tin mesun cabey y mesun color di cuero. Y asina e curpa a wordo hiba pa cremacion.

E hospital a pidi disculpa pa e bruhacion. E famia kier compensacion financiero si for di e hospital pa esaki. Nan ta contento y ta haye un milager cu despues di 1 luna pensando nan familiar ta morto pa haye bek bibo.

Esaki no ta kita e hecho cu nan mester a paga e costonan di cremacion, entierro y tambe cu nan a deshaci di cierto pertenencia di e señora. E anciana a hasta haye ta bay cumpra un corchon nobo paso famia a benta esaki afor, keriendo cu nunca mas e lo regresa pa drumi na cas.