ORANJESTAD, Aruba: Hotelnan miembro di Aruba Hotel & Tourism Association ta premira un trayectoria di recuperacion gradual na 2020.
Expectativa ta cu turismo su recuperacion lo depende riba varios factor pa cual ainda tin incertidumbre:
Fecha cu varios pais tin e virus bao control y por habri frontera.
Cuanto asiento avionnan lo por ofrece den futuro y sistema nobo di organisa asiento den avion.
Perdida financiero gigantesco pa gran cantidad di hende.
Protocol nobo cu lo existi pa biahe.
Un strategia mas sostenibel y responsabel pa pais maneha nan turismo.
Considerando e factornan aki, acopla cu posibilidad cu Aruba su frontera por habri bek pa Juni, y e deseo pa biahe cu ta existi ainda, pronostico averahe di e hotelnan di Aruba ta un crecemento di ocupacion gradual cu lo culmina na 55% na December 2020.
E grado di ocupacion proyecta ta cay bao di e nivel cu e industria por cubri nan gasto. Companianan cu ta depende di turismo pa entrada lo opera na un perdida ainda durante e resto di 2020 y comienso di 2021.
Realidad penoso ta cu un cantidad di compania no por sobrevivi varios luna di lockdown y e periodo di recuperacion economico.
Mientras cu Aruba ta prepara pa diversifica su economia pa un futuro mas stabiel, AHATA lo participa cu diligencia den e esfuersonan aki y sigui busca solucion inmediato pa sobrevivencia di dunador di trabou y e pilar principal di nos economia.
Tin necesidad urgente pa solucionan y mester di accionan decisivo di parti di gobierno pa ofrece alivio financiero substancial na dunado di trabou.