E arsobispo Italiano, Carlo Maria Viganò, ta pidi tur hende resa awe diasabra 11 di april 2020. E oracion masal mester fungi como un ‘exorcismo mundial’ pa combati coronavirus, esaki segun pensamento di e arsobispo.
E Italiano di 79 aña kier pa tur hende creyente uni den oracion exorcista pa pidi un fin na e pandemia di coronavirus. E ta pidi siguidornan di e creencia catolico pa resa e oracion cu den Latin yama ‘Exorcismus in Satanam et Angelos Apostaticos’.
E oracion aki ta conoci tambe como e ‘oracion na San Miguel Arcangel’. E Papa León XIII a institui e oracion aki na San Miguel arcangel pa e iglesia catolico. Segun e creencia catolico, e oracion ta ‘frena e poder di satanas’.
E arsobispo Viganò a manda e mensahe aki via un noticiero catolico bisando cu “den e temponan moderno turbulento aki, unda cu un pandemia a stroba catoliconan di asisti misa, esun ‘maligno’ ta den un furor y ta multiplica su atakenan tentando alma di hende pa peca.”
E religioso ta di pensamento cu e siman aki tawata oportuno pa esnan di creencia catolico bay confesa. E arsobispo ta pidi si pa tur hende keda paden y no kibra ley di cuarentena, pero pa uni si den oracion na cas.