World Health Organization (WHO) a raporta diasabra di ta bay investiga casonan unda cu algun pashent di COVID-19 ta test positivo atrobe pa e virus. Esaki despues cu nan a test negativo y tawata bou impresion cu nan a bira bon.
Sur Korea a informa diabierna cu nan tin 91 caso di pashent cu a test negativo, pero awor ta test positivo atrobe pa coronavirus. Jeong Eun-kyeong, director di e centro Koreano pa control y prevencion di malesa, ta bisa cu e virus por a wordo ‘re-activa’.
Y no cu simplemente e pashentnan aki a keda ‘re-infecta’ cu e virus. WHO a bisa di ta consciente di e casonan aki unda tin persona a wordo getest negativo y despues di algun dia ta test positivo atrobe. WHO ta trahando cu expertonan medico pa haya mas informacion riba e casonan di e individuonan aki.
WHO ta subraya cu ta importante pa momento cu ta bay colecta muestra pa haci test riba dje, pa sigui e proceduranan apropiadamente. Segun guia di WHO riba maneho clinico, un pashent por sali di hospital momento cu e tin 2 test sali negativo consecutivamente. Esaki mester a wordo haci 24 ora apart di otro.
Segun estudionan actual, tin un periodo di casi 2 siman unda cu sintoma di e virus ta surgi y cu pashentnan ta recupera. Esaki ta e caso pa esnan cu haya e virus cu sintoma leve. E tipo di test haci den e casonan unda cu atrobe ta mustra cu pashentnan ta test positivo, yama polymerase chain reaction (PCR).