Home Local Fact Check: Consumiendo bebida cayente por proteha bo contra COVID-19?

Fact Check: Consumiendo bebida cayente por proteha bo contra COVID-19?

SHARE

E pandemia di COVID-19 a trece cune no solamente panico, pero tambe informacion o recomendacion ‘medico’ cu ta falso y cu no ta basa riba hechos cientifico. Riba rednan social manera Facebook y WhatsApp informacion eroneo ta wordo comparti entre persona. E mal informacion cu ta wordo publica o manda den chat no ta wordo haci cu mal intencion.

Hendenan ta bou impresion cu cierto informacion riba internet ta legitimo y ta comparti esaki pa asina purba proteha nan ser keri. Riba rednan social por mira e conseho manera bebemento di awa cayente o bebemento di awa cayente cu lamunchi primi aden pa proteccion contra e coronavirus.

Experto den enfermedad respiratorio, Ron Eccles di Cardiff University (Reino Uni), ta informa cu no tin ningun evidencia cu bebida cayente lo yuda proteha contra infeccion viral. Eccles a haci investigacion den pasado pa e efectonan di bebemento di likido cayente ora un persona tin un griep o verkoud.

Mientras un bebida cayente manera te ta duna cierto alivio paso e ta yuda saca e slijm cu tin den boca y nanishi. E por yuda baha inflamacion tambe.  Eccles a informa tambe cu e sentimento di alivio o ayudo cu esaki por trece por ta un ‘placebo effect’ tambe. Pues mester subraya cu un bebida cayente o simplemente bebiendo awa no ta preveni o kita e virus cu ta causa e infeccion.

E virus ta contagia persona via gotas (droplets) cu un persona infecta cu e virus ta laga den aire momento cu e ta tosa, niester, papia etc. E gotas aki ta drenta den nanishi o boca (hasta wowo). Esaki ta infecta e celnan den e tracto respiratorio. Inhalando e gotas nan aki e ta yega te na pulmonan di un persona, y esey ta un area cu ta leu di unda likido por yega.

Na e momento aki no tin medicamento o vacuna ainda pa trata o cura COVID-19. Solamente e sintomanan por wordo trata. Cientificonan ta trahando riba posibel medicamento o vacuna, momento cu nan yega na un vacuna o otro medicamento esaki lo wordo publica pa e canalnan oficial. World Health Organization (WHO) ta e organisacion cu lo sigur duna di conoce ora esaki ta cla y disponibel.

Pues labando man pa 20 seconde, no mishi bo cara, kedando cas, teniendo distacia di 2 meter for di otro persona y bistimento di mondkapje pa cierto persona ta e unico maneranan real cu un individuo por proteha su mes y otronan. 

Den e imagenan abou por mira algun informacion eroneo cu WHO mester a contraresta.