E cuidad di Guayaquil tin 2200 caso registra di coronavirus. Aki ta papia di un representacion di 70% di e casonan total pa e pais.
Guayaquil, Ecuador – Famianan ta haya nan ta pone curpa di nan ser keri dilanti nan porta di cas. Persona cu a fayece paden di nan hogar ta wordo poni pafor canto di porta di cas o laga riba trottoir canto di caminda.
Famianan ta haya nan ta haci esaki pa motibo cu personal di mortuario por tuma algun dias prome nan busca un curpa. Mirando e calor y cu mayoria cas no tin airco, ta pone e curpa pafor pa evita e efectonan di descomposicion manera e holor fuerte cu ta ser emiti.
E cuidad di Guayaquil ta un centro pa comercio unda casi 3 miyon persona ta biba. E caracteristicanan aki sigur a causa cu esaki ta e area mas afecta tambe pa e virus. E areanan di e cuidad unda tin mas pobresa ta sufriendo di e efectonan di COVID-19.
E virus a plama rapidamente y hospitalnan di e pais no por carga e peso. Trahadornan di mortuario encarga cu e transportacion di morto no kier o no tawata por colecta e curpanan. Resultado di esaki ta cu curpanan a wordo laga dias largo den cas o pafor den solo poni canto di caminda.
Hopi ta biba den pobresa y no tin airco. Mirando con curpa di nan ser keri a cuminsa cambia, esaki mester a wordo poni pafor di cas. E bista di curpanan den estado avansa di descomposicion laga riba caya ta uno devastador y cu por duna un bista di kico ainda falta pa bin.
Un operacion entre militar y polis ta yudando cu e buscamento di fayecido, nan ta buscando como 30 curpa pa dia. Gobierno di e pais a institui curfew y lockdown. E pobresa di e pueblo ta haci cu e medida di lockdown no ta asina efectivo. Hendenan di menos recurso mester sigui subi caya pa traha nan cen.
E sistema medico di Ecuador a basicamente cay den otro. No tin lugar pa trata pashent. No tin manera pa duna cuido medico y haci test pa tur hende cu tin sintoma di e virus. Ecuador ta premira cu hopi mas morto lo cay.