Home Dutch Kingdom Hulanda tin un di e percentahenan di mortalidad mas halto den e...

Hulanda tin un di e percentahenan di mortalidad mas halto den e pandemia di COVID-19

SHARE

Hulanda tin un total di 16,627 caso registra di coronavirus y 1,651 morto. E pais Europeo ta conta cu un di e percentahenan mas halto di mortalidad.

Den Haag, Hulanda – Hulanda a adopta e medida di ‘inmunidad di grupo’ (herd immunity). Esaki ta referi na e concepto unda un populacion cu tin suficiente inmunidad na un enfermedad y ta causa cu infeccion no ta plama dentro di e grupo. Aki suficiente persona no lo contrata un enfermedad mas, esaki ta posibel hopi vez via vacunacion o inmunidad natural.

E meta aki cu e Hulandesnan tin ta wordo considera como uno ‘frieuw y calcula’ pa un experto Hulandes den salubridad publico. Na Hulanda tin varios negoshi cu ainda ta habri, ta esnan unda cu tin hopi mas contacto fisico a wordo sera. Tur scol, crèche y universidad ta sera.

Cuidadanonan a wordo avisa pa keda cas, pero nan tin algun excepcion (p.e. trabou, haci compras) tanten cu nan tene 1.5m di distanciamento social. Prome Minister Mark Rutte ta haya cu Hulanda ta un pais di ‘adulto’. Segun Rutte, hendenan ta contento cu nan ta wordo trata como adulto y no manera mucha. E mandatario ta duna impresion di ta contra di impone medidanan di seguridad riba e pueblo Hulandes.

E plan di ‘inmunidad di grupo’ di Hulanda ta uno cu Reino Uni tambe kier a introduci. Momento cu un consehador scientifico kier a revela e plan pa haci esaki, investigadornan a laga sa dibiaha cu e plan aki ta rekeri e aceptacion di morto di miyones di hende. E criticanan cu a bin a presiona mandatarionan di Reino Uni pa pone un stop na nan plan.

E plan di e gobierno di Rutte ta pa purba controla e virus mas posibel por medio di reduci e cantidad di infeccion y asina poco poco tambe crea un inmunidad na e virus. Na e momento aki Hulanda tin un total di 16,627 caso registra di coronavirus y 1,651 morto. Pa un pais di 17.3 miyon persona, e pais Europeo ta conta cu un di e percentahenan mas halto di mortalidad.

Cuido medico ta bou presion, nan falta equipo medico y espacio pa interna persona. Un pedido cu Hulanda a haci na un compania Chines pa equipo medico a resulta di ta productonan di calidad inferior. Pues material protectivo cu ta di alta necesidad ta keda scars. Tambe pa motibo di falta di espacio, tin pashent a wordo transferi pa Alemania pa ricibi cuido.

Entre tanto desafio, Rijksinstituut voor Volksgezondheid en Milieu (RIVM), e instituto cu ta duna guia na pais Aruba tambe, a comete un eror den un di nan pronosticonan. RIVM a inicialmente kere cu pashentnan den cuido intensivo lo keda 10 dia den ICU, pero en realidad pashentnan ta kedando un averahe di 23 dia.

E eror aki den pronostico di RIVM a causa cu tawata steun riba e hecho cu persona lo bandona ICU hopi liher, lagando espacio pa otro pashent. Ta ser premira awor cu pa medio april mester tin 2500 cama disponibel. Tambe si tawata sa cu e realidad ta cu un persona lo keda asina largo den ICU, medidanan estricto lo a wordo introduci mas trempan ainda pa sera horeca, trabounan di oficina y scolnan.

* Informacion RIVM a wordo updated y coregi 5 april.