Home International CDC ta recomenda pueblo Mericano pa bisti mask di tela ora bay...

CDC ta recomenda pueblo Mericano pa bisti mask di tela ora bay den publico ; Un recomendacion cu no ta sin consequencia

SHARE

Merca su institucion pa prevencion di enfermedad,  Centers for Disease Control and Prevention (CDC), a cuminsa pidi tur ciudadano pa bisti mask di tela den publico. Esaki a bin despues cu evidencia a indica cu tur hende mester cuminsa bisti mas. E recomendacion aki ta uno cu no a bin facil.

Manera a bin ta enfatisa, COVID-19 ta un virus nobo, e tin unicamente algun lunas di existencia. Desde e brote mundial di e virus, tur pais y institucionan internacional di salubridad a wordo poni bou presion. E meta ta pa purba di contene e cantidad di casonan.

Den un conferencia di prensa diabierna, Presidente Trump a anuncia cu CDC ta conseha tur persona na Merca pa uza mask o tapa cara traha di tela. Esaki como strategia pa combati coronavirus.

Ta pidi persona bisti mask ‘den areanan publico unda ta dificil pa mantene distanciamento social’. CDC ta continua na menciona cu esaki por ta lugarnan manera supermercado o boticanan. E recomendacion aki ta un cambio drastico den pensamento cu CDC tawata propaganda anteriormente.

Masks tawata solamente wordo recomenda pa persona cu ta enfermo o persona trahando den cuido medico. E recomendacion haci awor pa CDC ta pidi persona bisti mask traha di tela, esaki inclui masks traha na cas tambe.

Un suplica a wordo haci na e pueblo Mericano pa no sali bay cumpra masks cu mester ta destina pe persona den cuido medico. E instancianan di cuido medico conoce caba un scarcedad di equipo protectivo (p.e. e N95 mask). CDC kier preveni su recomendacion pa aumenta e scarcedad aki aun mas.

Aunke cu e evidencia ta limita, investigacionan ta keda sugeri cu bistimento di mask pa e publico en general lo por stop e plamamento di e virus. E miedo ta keda cu e recomendacion aki lo causa cu dokter y verpleegkundigen no por haya e mask medico cu nan mester.

Consequencia di esaki ta cu personal di cuido medico lo por wordo exponi na e virus y cu nan tambe lo bira malo. Mester nota cu banda di atende cu persona infecta cu COVID-19, tin personanan sufriendo di otro enfermedad cu ainda mester continua ricibi cuido tambe.

Expertonan ta preocupa tambe cu masks por duna hende un sentido exagera di seguridad. Den nos contexto local, Sra. Jurette Croes di DVG a menciona esaki varios biaha den conferencia di prensa. E ‘false sense of security’. E miedo ta cu persona lo no sigui tuma tur e otro pasonan pa proteha nan mes.

CDC ta pidiendo pa no neglisha e medidanan manera laba man bon pa 20 seconde, no mishi bo cara y tene na cuenta e social distancing di 2 meter. Aunke paisnan Asiatico ta incorpora uzo di mask, bon higiena y distanciamento social ta keda necesario pa lucha contra e virus. Pues un combinacion di tur e medidanan aki por yuda den e lucha.

E otro aspecto cu ta un punto di preocupacion pa expertonan ta cu hendenan cu no ta forma parti di e comunidad di cuido medico por haci eror ora di incorpora mask den uzo diario. Re-uzando e mesun mask, bistiendo e mask malo, mishiendo e parti pafor di e mask etc. Tur ta cosnan cu ta wordo conseha en contra.

Aunke cu e conseho di CDC no a bin facil y tin hopi discusion entre expertonan medico, e pensamento ta cu mask di tela por toch brinda cierto protecion. E virus ta plama via ‘droplets’ cu ta ser laga den aire momento cu un persona ta hala rosea, papia, hari, niester, hap o tosa.

E recomendacion di CDC ta cu mask mester wordo mira como un medida pa bo proteha bo mes di otro. E virus por presenta den un persona sin mustra sintoma. Pa posiblemente proteha otro di bo, bistiendo un mask bo ta preveni cu ta emiti ‘droplets’ via sputum (scupi) den aire y contagia otro.