Bloemond: Diasabra den careda di 5 ‘or, presencia di polis a wordo pidi cu hopi urgencia na un cas na Bloemond pa un cacho cu morde su doño, lagando e seriamente herida riba vloer.
Na yegada di polis mesora nan a mira e situacion y a saca nan arma reglamentario y a tira e cacho mata. E doño tabata riba vloer baña na sanger, e tabata tin varios mordi na diferente parti di su curpa e homber tabata kehando di hopi dolor.
Na e sitio nan a bin compronde cu e cacho, un fila of mastiff pa un of otro motibo a ataca e conocido criador di cacho Esteban Lacle miho conoci como Dichi. Dichi a bay den e haula y e cacho a atak’e lagando e seriamente herida. Bisiñanan a tende Dichi ta grita pa auxilio y mesora a sali bay mira kiko ta pasando. Ora nan a mira kiko e cacho a haci cu Dichi, nan a bati alarma.
Ambulance a tarda pa yega, mientrastanto cu Dichi tabata riba vloer ta keha di hopi dolor. Dos ambulance a presenta y mesora a trata Dichi na e sitio y despues cu a stabilis’e nan a transport’e cu urgencia pa Hospital.
