Polis i Ministerio Públiko ta anunsiá ku lo bolbe habri un asina yamá ‘cold case’. Den e kaso aki ta hasi petishon pa yudansa na pueblo di Kòrsou i lo otorgá un rekompensá di Naf. 10.000,- pa e tep(nan) di oro ku lo hiba na solushon di e kaso aki. Ta trata di kaso di morto di un hobensita di 19 aña, Rayziënne (Raiza) Scoop. Den e marduga di 31 di dezèmber 2011 pa 1 di yanüari 2012, el a bandoná kas di su frei i despe di esei tabata pèrdi pa un tempu largu. Riba 19 di mart 2012 a haña un kurpa sin bida den mondi na Playa Canoa. Pa medio di investigashon di DNA na enkargo di NFI na Hulanda finalmente a determiná ku e kurpa tabata trata di e damita di 19 aña Raiza Scoop.
E tempu ei, na 2012, despe di investigashon polis a hasi mas detenshon i a skucha testigunan. Sinembargo, dado moment e investigashon di polis a pega i no tabatin sufisiente prueba pa por a hiba un persona Korte relashoná ku e morto di Raiza Scoop.
Depsues ku resientemente polis a analisá algun dosié ku kasonan di asesinato bieu ku no a keda solushoná, a disidí den konsulta ku Ministerio Públiko di skohe pa e kaso di Raiza Scoop i habri bèk e investigashon. Esaki m0irando e seriedat di e kaso, den kua e edat hóben di e damita naturalmente a hunga un ròl i e echo ku – despe di análisis – tòg a bin topa ku sierto puntonan ku ta útil pa mas investigashon. Banda di esei, hustisia ta spera aworakí tambe riba e yudansa di pueblo i pa e motibu lo dunaun rekompensá di Naf. 10.000,-
E petishon na personanan ku tin informashon tokante e desaparishon i/òf e morto di Raiza Scoop, kaminda kalke detaye ta bonbiní, ta pa tuma kontakto mas pronto posibel ku polis riba e number di telefòn: 108.