Bernhardstraat, San Nicolas: Diasabra algo prome cu 7’or di anochi, presencia di polis y brandweer a wordo pidi cu urgencia na Citgo Essoville pa motibo cu un persona lo a cende un candela den e baño di Citgo Essoville, cual sigur ta algo hopi peligroso mirando cu ta trata di un gasstation y cu hopi cerca tin basta cas.
Na yegada polis mesora a evacua tur hende cu tabata cerca di e gasstation pa asina evita si acaso e candela expande y e bay for di man.
Na momento cu brandweer a yega ya e personal di Citgo Essoville a domina e candela aki caba, pero asina mes brandweer ta haci un control den e baño pa confirma cu e candela enberdad a paga por completo.
E area aki a keda cera te ora tur e trabounan necesario na e sitio a caba y cos a bira normal bek.
