Den cuadro di e proyecto eGovernment, e siman aki tin diferente reunion di tumando luga hunto cu un Director y co-fundador di eGovernance Academy di Estonia (EGA), Linnar Viik, cu ta un partner di Aruba den implementacion di e proyecto.
Nos Prome Minister Evelyn Wever-Croes a reuni cu Sr. Liinnar Viik, y aki a discuti e plan di implementacion, y tambe con EGA por yuda Aruba pa bira un lider y pionero den e region di Caribe.
E proceso di eGovernment a cuminsa na aña 2018, y e eGovernment Road Map ta den su fase final y dentro di poco esaki lo wordo publica ora cu e fase di consultacion cu stakeholders termina. Cu hopi entusiasmo y optimismo Prome Minister a comparti cu ya caba nos a drenta den e fase inicial di implementacion.
Un ‘Stuurgroep’ a wordo apunta, y tres (3) comision di trabou, cu ta Legal, Tecnologia, y Digital ID, cu ta actualmente reuniendo y preparando pa e prome fase di implementacion cu ta e periodo di 2020 pa 2022. E fondonan ta disponibel y algun inversionnan importante lo wordo haci e aña aki pa por traha e infrastructura necesario y brinda miho servicio na comunidad.
Durante e siman lo tin varios consultacion cu stakeholders, tambe lo tin workshops pa tur Departamento di Gobierno pa asina tur departamento por ta bon informa y tambe bon prepara pa e ola di transformacion digital cu ta bay bin na Aruba y pa asina nan por sigui sirbi e ciudadano na e miho manera posibel.
Ya caba tin varios proyecto piloto cu ta finalisando unda cu tin mas intercambio di datos digital tumando luga entre Departamentonan di Gobierno na un manera mas sigur, simpel, y instantaneo. E aña aki un di e metanan di Gobierno ta tambe pa por brinda aun mas servicio ‘online’. Esaki lo mehora calidad di bida di e ciudadano, cu na final di dia ta e meta principal.
Den transcurso di e siman aki nos lo sigui informa riba e reunionnan importante aki. Prome Minister kier a finalisa na gradici tur e departamentonan pa nan compromiso cu Aruba, y tambe sector priva cu lo tin un rol importante tambe den esaki.
