Oranjestad – Minister Xiomara Maduro tabata presente na e presentacion di sra. Eva Schloss, den Ballroom di Hilton Aruba Caribbean Resort & Casino, organisa pa Chabad Aruba.
Sra. Eva ta un sobreviviente di e Holocausto Nazi durante añanan di Segundo Guerra Mundial y tabata amiga di infancia di Anne Frank. Despues ela bira ‘stepsister’ di Anne Frank na momento cu su mama a bin casa cu tata di Anne Frank.
E anochi a inicia cu un discurso di nos Prome Minister Evelyn Wever-Croes pa despues Rabbi Ahron Blasberg di Chabad Aruba introduci su casa Sra. Chaya Blasberg cu tabata esun ecarga pa entrevista Sra. Eva Schloss.
Sra. Eva a conta un storia impresionante cuminsando cu su infancia na Austria y con e hunto cu su famia mester a muda bay Hulanda pa scapa e persecucion di e Nazinan. Tambe ela conta con ela conoce Anna Frank y su famia y con nan a sconde pa e Nazinan na Hulanda. Ela relata con nan a wordo traiciona pa e nurse na unda nan tabata scondi y a wordo gara y a wordo hiba pa camponan di concentracion na Auschwitz. Tabata hopi conmovedor pa a scucha sra. Eva relata con e bida tabata den e campo na Auschwitz y tambe despues con nan a wordo libera.
E tabata un charla hopi emotivo y ta di admira cu apesar di tur e mal experiencia cu sra Eva a pasa aden, toch ela scohe pa wak e bon den hende. Sra. Eva Schloss ta un bon ehempel pa nos, ya cu apesar di locual ela pasa aden como sobreviviente di holocaust, e ta sigui kere den e bon cu ta biba den tur hende. Su mensahe ta pa recorda nos cu cada acto di bondad y cariño ta haci e mundo aki mihor. Siña di bo pasado, biba e presente y anticipa bo futuro. Ta masha importante pa conta nos yiunan di locual a sosode durante holocaust y pa corda nan riba e mensahe di sra. Eva cu cada acto di bondad y cariño lo haci e mundo aki uno mihor.
E mandatario ta gradici Chabad Aruba y e Comision organisador pa e invitacion y pa a organisa un evento historico asina pa Aruba na unda cu nos comunidad tabata tin e oportunidad di scucha un sobreviviente di holocaust conta su storia impactante.
