Oranjestad – Aruba
Diamars atardi pa anochi e noticia cu a haya curpa sin bida di Paulus Martijn a coy full un otro rumbo.
Manera nos a trece den un Developing Story den oranan di merdia cu informacion a drenta cu lo a haya e curpa sin bida di Martijn.
Famia tawata na Zeerover y por a mira ambulance y polis tambe.
Pues tawata mustra algo oficial, cu esnan cu a sali mainta rumbo Colombia lo a localisa e curpa te cu nan ta na caminda cu ne pa Aruba, cual ta algo cu no ta normal.
Aki ta unda cu e storia a cambia, ora nos pone puntonan hudicial cu mester tene cuenta cune.
Na prome luga no ta posibel pa yega piki un curpa sin bida pone den boto y sali direccion Aruba cune.
Autoridad Colombiano hamas lo laga un caso manera esaki bay sin wordo investiga !
Diamars mainta e tres compañeronan cu lo tawata cune a sali y te hasta nan a post un video cu nan a sali bayendo pa busca Martijn.
Aki ta unda cu hopi hende tawata puntra nan mes, con sigur nan sa cu lo bay haya Martijn?
Tur esaki tawata basa ariba un supuesto Satellite Phone cu tawata emiti(manda) señal di su localidad. Esaki aparentemente tawata hunto cu Martijn.
Pero, dicon ta te diamars a bin haya un location di e telefon y no a haya esaki mas prome cu e tawata mas cerca di Aruba?
Nan a bisa autoridad cu Paulus tawata den posesion di un Satellite Phone ?
Esakinan ta preguntanan habri. Dicon a bin diasabra anochi aden na Rodgers Beach y te ora ey a bati alarma, siendo cu tin un Satellite Phone cu mesora por a yama autoridad y avisa kiko a pasa.
Merdia segun informacion no oficial, un persona ariba e boto cu a sali lo ta esun cu a bisa cu a haya e curpa di Martijn. Pues esaki ta un rumor cu ta bayendo rond.
Te cu diamars anochi no ta conoci kiko a para di e Arubianonan (compañeronan) cu a sali pa bay busca Paulus Martijn.
No ta conoci si nan tambe ta perdi of ta deteni.
Tambe kiko autoridad local mes ta haciendo, paso di parti autoridad bo no ta scucha nada.