Pa asina tur dunado di cuido ta riba mesun liña Dr. Horacio E. Oduber Hospital conhuntamente cu LABHOH a organisa dialuna anochi den un sala yen di Cas di Cultura un session di informacion tocante e ultimo desaroyonan pa cu Coronavirus. E session di informacion aki tocante Coronavirus a ser dirigi pa Andert Rosingh, arts- microbioloog di LABHOH Aruba y Corsow conhuntamente cu Marije Hofstra, arts- microbioloog di UMC Utrecht. Na final tabatin oportunidad pa hasi pregunta na un panel cu tabata consisti di diferente experto. Algun di e temanan cu a bin pa dilanti ta e situacion actual, con e virus aki ta ser transmiti, e gruponan di riesgo y alabes casonan “evidence – based”.
Dunado nan di cuido di Hospital, LABHOH, specialistanan, dokternan di cas, Imsan, Respaldo, Wit -Gele Kruis, DVG, SVB y mucho mas a asisti e anochi informativo aki.
Un di e preguntanan cu sigur a ser hasi ta si enberdad na Aruba nos ta core riesgo pa haya e Coronavirus, cual Hofstra a duna di conoce cu ta importante pa bay tras di informacion “evidence-based” y no tras di rumores, ni emocion y tampoco miedo.
Na final de presentacion a duna di conoce tambe cu no tin motibo pa crea ansiedad na Aruba, masbien ta importante pa sigi di cerca cuidadosamente e desaroyonan mundialmente cu diariamente ta cambia. Tambe ta importante pa duna informacion corecto, tuma medida nan di prevencion y lo mas importante ta pa tin un protocol claro pa tur esnan envolvi den e cuido.
Dr. Horacio E. Oduber Hospital tin nan protocol cla y actualisa en caso cu un of mas pashent presenta y mester wordo admiti cu sintoma nan di Coronavirus. E personal di Hospital ya caba tin experiencia y ta capacita pa trata pashent nan cu malesa contagioso. Sinembargo e personal di Hospital a haya training pa e protocol nobo y ta cla pa aplica esaki pa asina proteha nan mes y demas pashent nan cu lo por wordo admiti pa Coronavirus. Hospital di Aruba tin un plan pa actua en caso cu e Coronavirus presenta pa asina contene esaki dibiaha y evita transmission.
Danki na ful e team di Hospital conhuntamente cu LABHOH cu den menos di 3 dia a hinca e anochi aki den otro pa asina tur dunado di cuido ricibi e informacion necesario y corecto pa ta prepara si encaso e bati na nos porta.
