ORANJESTAD – Diasabra atardi miembronan di Aruba One Happy Island Lions Club a bishita nos grandinan na St. Thuiszorg Jaburibari y a haci donacion di un television pa nos grandinan por mira programanan, entretene y informa nan mes. Ademas di esaki nos grandinan a haya un treat saludabel di pan di Subway y juice y na final a entrega un baki di fruta pa nos grandinan. Tabata un atardi hopi ameno caminda e miembronan di Aruba One Happy Island Lions Club a combersa cu nos grandinan, como tambe Fl. Angelo Koolman a canta algun cancion y Fl. Clarette Quandus a declama un poesia pa nos grandinan kendenan a pasa un dushi atardi.
Presidente Fl. Junior Arends a gradici nos grandinan pa nan dedicacion y trabao pa nan famia y comunidad di Aruba. Ademas a gradici e trahadornan di St. Thuiszorg Jaburibari pa nan bunita trabao diario, e cuido, atencion y cariño pa nos grandinan. Un atardi hopi bunita caminda por a comparti cu nos dushi grandinan. Nos tur mester tuma tempo y pone mas atencion y cariño na nos grandinan, bishita, combersa y pasa tempo cu nan. Un danki tambe na Sr. Reynold Semeleer pa su cooperacion brinda.
