Ora hende ta bou influencia, nan ta haci cosnan di mas straño cu por pensa. Un chauffeur a hit and run, ela bay para su auto serca di un mondi y a dicidi di drumi den e auto. Polis a bin topa cu e auto y den e auto nan a bin topa cu e chauffeur morto na soño, benta tur di banda den e auto.
Tanki Leendert: Dialuna den careda di 1’or y 45 di marduga a sosode un caso di Hit and Run un poco pazuid di Cas Casuela.
Un Toyota Yaris Blanco maneha pa un homber tabata biniendo di pazuid. E chauffeur di e Yaris tabata bou influencia y tabata coriendo zig zag riba caminda bayendo direccion panort. Un dama den un Huyndai I10 tabata bayendo direccion contrario y na momento cu ela nota cu e Yaris cu tabata biniendo di pazuid tabata coriendo zig zag riba caminda, ela trata na evita pa e Yaris no dal contra su auto, pero lamentabelmente e no por a evita esaki, e Toyota Yaris a dal su auto y e chauffeur no a para pa su responsabilidad y a sigui core.
E dama chauffeur di e Huyndai I10 a dicidi mesora di sigui tras di e Yaris. Na dado momento e chauffeur di e Toyota Yaris a dicidi di staciona su auto banda di un mondi dilanti di un cas na Tanki Leendert. Mesora e chauffeur di e I10 a yama polis.
Na yegada di polis e dama a conta polis tur loke a caba di sosode, polis a tuma datos y na momento cu nan a cana bay na e Toyota Yaris pa nan sorpresa den e auto nan a bin topa cu e chauffeur drumi morto na soño, tur benta di banda den e auto. Polis a nota di biaha cu e chauffeur tabata bou influencia.
Mesora e agentenanan policial na e sitio a pidi pa e transportwagen di polis pa asina transport’e pa wardadi polis caminda elo mester a presenta dilanti Hulpofficier pa duna cuenta di su actonan.
