Willemstad – A pesar di e pasonan importante cu Corsou a dal pa pone su presupuesto na ordo, aña 2019 lo cera atrobe cu un deficit. Colegio di supervision financiero di Corsou y Sint Maarten (Cft) ta constata cu te aworaki a enfatisa demasiado riba aumento di entrada na luga di riba reduccion di gasto. Sigur den combinacion cu reforma economico, reduccion di gasto por impulsa crecemento economico y mehora balansa di pago. Pa aña 2020 ainda tin un desafio substancial. Asina, por ehempel, e gastonan di operacion di e hospital nobo ta ANG 81 miyon mas halto cu e hospital bieu Sehos, a calcula cierto ingreso fiscal demasiado halto y mester tene cuenta cu e dividendonan presupuesta pa CBCS y RdK lo no drenta. Tambe medida manera e liña cero pa empleado publico ta sufri tardansa.
Di acuerdo cu e instruccion cu Conseho di Ministro di Reino a duna Corsou dia 12 di juli 2019, Pais Corsou mester compensa e deficitnan di 2017 y 2018 pa medio di e surplusnan di servicio ordinario den e añanan 2020 te y cu 2022. Na 2017 a realisa un deficit den servicio ordinario di ANG 116,8 miyon. E proyecto di cuenta anual di 2018 ta cera cu un saldo negativo di ANG 58,5 miyon den servicio ordinario. Den e proximo simannan lo mester sali na cla si e deficit aki lo aumenta mas ainda a base di e control di e cuenta anual. Por lo pronto e total di e deficitnan di 2017 y 2018 ta monta na ANG 175 miyon. Mientrastanto tambe ta evidente cu 2019 lo cera cu un deficit. Lo mester compensa esaki tambe.
CMC y cuido
E hospital nobo Curaçao Medical Center (CMC) y cuido di salud ta forma riesgo financiero pa presupuesto di Corsou: a corto plaso ta trata di, entre otro, gasto operacional mas halto pa e hospital y cuido di salud. Aña pasa na augustus Gobierno a entrega un peticion na Cft pa un prestamo adicional di maximal 200 miyon florin pa e hospital nobo. Ta crucial pa Corsou indica na cua manera lo compensa e gastonan operacional mas halto ey pa medio di cambio concreto den e cuido hospitalario. Lo comproba esaki tambe den un di dos opinion di SOAB y ta crucial pa esaki –originalmente priminti pa prome cu dia 1e. di december 2018– awor lo ta rapidamente disponibel.
Riesgo financiero
Cft ta identifica un gran cantidad di acontecemento cu lo por tin influencia riba e presupuesto di Pais Corsou. Un di nan ta e solucion cu ta busca pa e problema di Girobank. Ademas, te ainda no ta cla ta cua lo ta e consecuencianan di e cooperacion previsto entre Refineria di Kòrsou y Grupo Klesch, cual ta interesa den continua e actividadnan di refinacion. P’esey, por lo pronto ta keda vago ta cua efecto e cooperacion aki lo tin riba economia y presupuesto di Corsou.
Presupuesto di 2020
Tambe e medidanan den e presupuesto di 2020 ta hayando tardansa y entretanto a bira evidente cu lo mester ahusta e presupuesto aki. Asina, por ehempel, segun expectativa e dividendonan presupuesta pa CBCS y RdK lo no drenta, e medida cu tin di haber cu e liña cero pa e empleadonan publico parcialmente ta sufri tardansa y lo mester ahusta cierto calculacion di impuesto bay abou. Corsou a compromete su mes pa entrega un modificacion di presupuesto a corto plaso pa provee den esey. Cft a conseha explicitamente pa reduci e gastonan.
Maneho financiero
Progreso den ehecucion di e mapa di trayecto cu mester conduci na un declaracion aprobatorio di accountant tocante e cuenta anual di 2021 ta limita. Parce cu falta un bista global total y un guia central. A pidi asistencia tecnico pa varios proyecto y, aunke e Acuerdo di Crecemento ta ofrece oportunidad pa haci esey, ainda no a realis’e.
Cft a haci un bishita na Corsou di dia 10 te y cu dia 12 di februari y a tene combersacion cu Gobernador, Ministro di Finansa, Ministro di Salubridad, Medio Ambiente y Naturalesa, Conseho di Ministro, e Comision Financiero di Parlamento, Stichting Overheidsaccountantsbureau (SOAB), Curaçao Medical Center (CMC), Servicio di Wardacosta, Conseho Social Economico (SER), Banco di Seguro Social (SVB) y Banco Central di Corsou y Sint Maarten (CBCS).