Home » Ministerio Publiko ta informa: SINKU NEGOSHI KONDENÁ: No registrá na FIU ta kastigabel

Ministerio Publiko ta informa: SINKU NEGOSHI KONDENÁ: No registrá na FIU ta kastigabel

by Admin
0 comment 62 views

Korte den promé instansia a kondená sinku empresa pa e echo ku nan no ta registrá na FIU i den mayoría kaso a imponé un but di Nafl. 2500,-. Esnan ku a keda kondená ta dos negoshante di auto i tres makelar. A kuminsá e kasonan penal debí na un denunsia di FIU (Financial Intelligence Unit Curaçao, ántes MOT) na aprel 2019. Pa motibu di esaki, Ministerio Públiko a hasi 44 proposishon di transakshon na makelar i negoshantenan di auto. A hasi e denunsiá despe ku tabatin un ‘pilot’ kaminda a investigá makelarnan i negoshantenan di auto ku no ta registrá na FIU. E registrashon aki ta obligatorio pa personanan i instansianan ku ta kai bou di e lei kontra labamentu di plaka. Ta un echo kastigabel pa no ta registrá na FIU.

Despues di a manda e proposishon di transakshonnan na fin di aprel 2019, ku tabata trata di butnan te ku 1500 florin, hopi di esnan envolví a registrá na FIU. Ministerio Públiko ta satisfecho ku e resultado aki. Sinembargo, tin ainda algun ku no a registrá i ku no a paga e transakshon. E empresarionan aki a risibí un ‘aanmaning’ di Ministerio Públiko pa paga e transakshon ainda. Finalmente, sinku empresa no a paga e transakshon i no a registrá na FIU, òf no a hasi tur e registrashonnan obligatorio na FIU. Ministerio Públiko a dagfar e sinku empresanan aki. Ta trata aki di dos negoshante di outo i tres makelar.

E sinku kasonan den Kòrte a tuma lugá 13 di yanüari 2020. Hues a duna sentensia di forma verbal den tres di e kasonan. Den e otro dos kasonan, a duna sentensia awe 27 di yanüari 2020. Tur e empresanan a haña kondena konforme e eksihensia di e fiskal di Ministerio Públiko. Den mayoria kaso a imponé un but di Nafl. 2500,-. A dokumentá i lo publiká e sentensianan di awe.
Ministerio di Públiko ta konsiderá e registrashon di esnan ku tin un obligashon di mèldu, manera makelarnan i negoshantenan di outo, di gran importansia. E registrashon ta e komienso di e responsabilidat di e empresarionan pa mèldu transakshonnan inusual. Investigashon di kliente i mèldumentu di transakshonnan inusual ta pilarnan importante den kombatimentu di labamentu di plaka i finansiamentu di terorismo. E mèldumentu di transakshonnan inusual ta esensial pa hasi mas difísil posibel pa kriminalnan pasa sèn for di baho mundu pa sirkulashon di plaka legal.

Un resultado positivo di e proyekto aki ta un subida di registrashonnan di e empresanan ku tin obligashon di mèldu na FIU. Ta trata aki tambe di empresanan di otro sektornan lòs di e proyekto manera abogadonan, dunadónan di servisio hurídiko i fiskal i servisionan di ‘trust’. Den estrecho koperashon ku Ministerio Públiko, FIU lo sigui pidi atenshon pa e registrashon na FIU i mèldumentu di transakshonnan inusual na FIU.

Pa mas informashon tokante registrashon i mèldumentu na FIU por subi riba www.fiucuracao.cw.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio