Ser’i Teishi: Diadomingo algo pasa di 4’or y mey di marduga, presencia di polis y ambulance a wordo pidi cu urgencia pa un accident hopi serio entre auto cu brommer, tambe a drenta informacion cu e auto a bolter y cu tin herido. Esaki a sosode riba Green Corridor un poco mas pariba di e rotonde di Ser’i Teishi.
Na yegada polis enberdad a bin topa cu e auto gebolter y dos brommer pega y troci den otro. E motociclistanan ambos tabata herida y un su situacion tabata mas serio cu e otro. Tambe na e sitio nan a bin compronde cu e motociclistanan tabata bayendo direccion pariba y na dado momento un SUV, a bin nan tras, a yega hopi cerca di nan, den un forma mescos cu kier a pushanan for di caminda. Na dado momento e tabata asina cerca di e brommernan cu ela dalnan y keda lastranan riba un distancia di un palo di lus pa otro, e brommernan a bay dal contra un palo di lus y e impacto hopi fuerte a pone cu e brommernan a troce y a keda pega den otro. Por bisa cu e motociclistanan a scapa milagrosamente. Den impacto e chauffeur di e SUV a perde control y a bolter cu su auto.
Na e sitio mientras cu paramediconan di ambulance tabata tratando e motociclistanan, e polisnan a nota cu e chauffeur di e Suv tabata bou influencia, mesora a manda pidi pa un test di alcohol y despues ela keda deteni y transporta cu transportwagen pa Warda di polis. E dos motociclistanan a wordo transporta cu ambulance pa hospital.
Polis a cera e rijbaan pa bay direccion pariba for di e rotonde Ser’i Teishi te na e rotonde di Drive Inn, pa asina nan y personal di ambulance por haci nan trabou den tur trankilidad.
Takelwagen a hiba e auto y e brommernan for di e sitio. D.O.W. a presenta pa tira santo riba e caminda unda azeta di motor a basha.
