ORANJESTAD (AAN) – Diamars mainta Minister di Turismo, Salubridad Publico y Deporte Sr. Dangui Oduber a anuncia cu entrante di januari 2020 e pensioen di biehes lo subi. Fondonan di pensioen ta wordo paga na e pensionadonan door di banco di seguro social (SVb) cu ta resorta bou di ministerio di Salubridad Publico. Recientemente Gabinete Wever-Croes ta anunciando varios noticianan positivo manera e legalisacion di cannabis medicinal y tambe reduccion di 10 porciento di e tarifa di coriente. Esaki ta un otro noticia positivo pa comunidad y specialmente pa e pensionadonan.
Conseho di Minister, riba proposicion di Minister di Turismo, Salud Publico y Turismo, a dicidi di aumenta e pensioennan di biehes di e siguiente forma entrante 1 di januari 2020:
– Pensioen pa soltero ta aumenta di 1.132 pa 1.157 florin
– Pensioen pa pareha ta aumenta di 1.906 pa 1.948 florin
– Pensioen dividi pa pareha ta aumenta di 953 pa 974 florin.
E pensioennan pa huerfano y vuido ta keda adapta cu e mes un porcentahe. Aña 2019 tambe minister Dangui Oduber a aproba e aumento aki. Den 2 anja di gobernacion a aproba un aumento di 84 florin pa parehanan casa y 50 florin pa soltero.
Minister Dangui Oduber kier a gradici Sr. Edwin Jacobs tambe di SVb pa haci e ehercicio necesario pa cumpli cu un aumento pa nos pensionadonan.
E ser humano ta central y nos ta cumpli cu esaki!