Parlamentario Endy Croes a analisa e efecto di e anuncio haci pa Gobierno siman pasa diahuebs momento cu Minister Presidente di Aruba Evelyn Wever Croes bou di kende e cartera di Energia ta resorta a haci e anuncio oficial cu e tarifa di coriente lo conoce un reduccion di 10% pa Pueblo, 9% pa Fundacionnan, Misa, School y 7% pa Comercio entrante 1 di januari 2020. E pregunta cardinal cu por a scucha fin di siman riba caya ta: Ta con Minister President Evelyn Wever Croes si a logra den apenas dos aña locual Mike Eman den 8 aña no a logra?
4 punto esencial di e vision nobo
Parlamentario Endy Croes a busca tur e documentonan necesario pa por duna splicacion alcaso. Rapport di investigacion a compila hopi informacion. Locual ta refleha hopi cla ta cu bou liderazgo di Mike Eman hopi importante tabata e show politico y complace amigonan y miembronan di partido malusando fondo di Utilities. Evelyn Wever Croes sinembargo a pone un vision su dilanti y a pidi tur esnan encarga cu Utilities pa cumpli cu un maneho financiero prudente, no lo usa placa di Utilities pa carga gastonan di gobierno, percura pa gobierno haya su fair share na Dividendo y percura pa baha prijs di awa y coriente. Pues cla y raspa. Esaki tabata e 4 puntonan esencial di e vision nobo. Board nobo di Utilities mesora a cuminsa enfoca riba e direccion nobo pero a constata alabes cu Utilities tabata manera un “sefta” pa e gobierno anterior. A cuminsa pa “STOP” tur e bagamunderianan di e gobierno anterior.
Bagamunderianan di Mike Eman
Asina a kibra contract cu Horizon Consultancy di Richard Arends kende a cobra alrededor di 4 miyon florin, a stop contracto cu un revista internacional cu tabata cobra 28 mil florin pa cada articulo cu Mike publica, a stop biahenan di amigonan di Mike Eman cual Utilities a paga na un suma di 621 mil florin, a kibra tur contract cu abogado Sjiem Fat, amigo di Mike kende a suta 5.3 miyon florin overall, a para locura di Mike Eman esta Green Conferences cu Utilities y WEB tabata sponsor riba 500 mil florin, a kibra tur contracto y contacto cu e biyonario Richard Branson, a stop proyectonan di Europe Meets America cu tabata costa miyones, tambe a para e locura di paga private jet pa Al Gore bin tira speech. Utilities a presenta asina un lista cu tabata costa Aruba miyones y kibrando tur e contractonan aki ya caba a mira un alivio y posibilidad alinstante cu por reduci prijs di coriente.
Pueblo ta haya su fair share
Mas cu claro Gobierno a keda den shock cu tur e hayazgonan aki pero alabes contento cu awor a crea espacio pa duna Pueblo su fair share enbes di duna amigonan manera Mike Eman y Mike de Meza tabata haci. Cu un maneho coherente drechi y cu prioridadnan corecto saliendo di e punto di bista cu e “Hende ta Central” a logra den apenas dos aña un rebaho substancial riba prijs di coriente. Awor lo sigui pa den futuro lo por logra baha prijs di awa tambe.
Parlamentario Endy Croes a splica cu den restaurant, supermercado, barnan, lugarnan di bende kerstboom y pues den tur skina di Aruba por a sinti un alegria enorme cu e decision corecto aki. Por Sinti E Cambio!