Diabierna mainta Parlamento a yama un reunion di urgencia di Comision Central, pa atende un peticion urgente di Gobierno pa yuda Serlimar. Parlamentario mr. drs. Richard Arends a splica cu Gobierno a manda pidi gevoelens di Parlamento pa un gasto adicional di 800 mil florin pa Serlimar prome cu fin di aña. Algun siman atras ainda durante presentacion di e Najaarsnota 2019, Gobierno a bisa cu e gastonan adicional di Serlimar lo a wordo cubri cu reduccion den otro gastonan. Awe Gobierno ta presenta e peticion pa fondonan adicional sin duna un splicacion pakico e gastonan aki ta.
Parlamentario Richard Arends ta hopi preocupa cu den prensa a scucha cu parti di e suma adicional aki ta pa paga salario. Sinembargo e peticion cu Parlamento a ricibi, no ta indica esaki. E reunion di Comision Central na prome instante tabata pa 10:00, pero a cambi’e pa 12:15pm. Den prome instante Minister Romero lo a cubri e gastonan, pero finalmente ta Minister Ruiz-Maduro lo mester cubri e gasto adicional aki.
Miembro di Parlamento, Richard Arends, a enfatisa cu fraccion di AVP ta desaproba un procedura asina iresponsabel. Gobierno tin cu tene bon cla cu e no por pasa su responsabilidad riba Parlamento. Ta entrega Parlamento un carta sin splicacion, sin substancia, sin conseho, sin peticion oficial di Serlimar, sin duna indicacion,unda e placa aki ta bay y mucho menos kico lo ta e gastonan premira te cu fin di aña. Simplemente fraccion di AVP no por a bay di acuerdo cu esaki.
Remarcabel cu esaki ta di tres biaha cu Parlamento ta haya un peticion pa midi nan gevoelens mientras cu ainda presupuesto supletorio 2019 no a ni yega Parlamento. Richard Arends tambe ta menciona e hecho cu algun siman atras Gobierno a bin midi sosten pa fondonan adicional pa Departamento di Impuesto, despues a bin pa extende contractnan di Social Crisis Plan y awe cu urgencia pa Serlimar supuestamente pa paga trahadonan, pero den carta cu a ricibi di Gobierno ningun momento ta menciona ni indica cu ta trata aki di salario pa trahado.
Un situacion lamentabel caminda e Minister saliente a garantisa Parlamento, como tambe e lider di fraccion di mas grandi den coalicion, cu Serlimar no lo tin gasto adicional e aña aki. Pa finalisa, e Parlamentario a menciona cu e situacion aki net prome cu fin di aña no ta un sorpresa cu niun hende a spera.