Oranjestad – Aruba; Sociaal Crisisplan (SCP) ta desea pa durante temporada di fin di aña, tur hende corda riba e echo cu tin hopi hende cu no por celebra un dushi y feliz pasco, paso nan situacion ta uno diferente. Na Aruba tin hopi casonan di abuso y negligencia di adulto, mucha y hende grandi y esaki ta algo cu nos como comunidad no mag di lubida.
Pesei mes pa e temporada aki di fin di aña Sociaal Crisisplan (SCP) tin e deseo pa tur hende absorba e mensahe cu: Amor puro ta caba cu tur maldad! Amor pa bo mes. Amor pa bo famia. Amor pa amistad. Amor pa bo coleganan. Amor pa nos comunidad. Amor pa Aruba!
Pa e temporada aki di fin di aña Sociaal Crisisplan (SCP) kier enfoca ariba e mensahe bunita y puro cu ta cubri e topico di nos norma y balornan. E respet pa otro, e humildad den curason, e famia cu ta central y tambe e amor pa otro. Sociaal Crisisplan kier pa tur hende pone e norma y balornan central den nos curason pa e temporada aki di fin di aña y corda cu: Amor puro ta caba cu tur maldad! Asina nos ta desea un Bon Pasco pa Tur!