Home Local Diamars a yega Aruba pa prome biaha Aruba Ports Authority ta...

Diamars a yega Aruba pa prome biaha Aruba Ports Authority ta yama bon bini na Norwegian Epic 

SHARE

 

Diamars APA a yama bon bini pa prome biaha na Aruba, e barco crucero Norwegian Epic. E barco crucero a sali diadomingo anochi for di San Juan, unda Aruba tabata su prome port of call riba e itinerario aki.

Den transcurso di mainta a tuma luga e acostumbrado ceremonia, unda gerencia di APA, representantenan di ATA, Maduro & Sons y demas stakeholders a intercambia e tradicional recuerdonan cu e capitan y personalmente yama e capitan cu su tripulacion y pasaheronan bon bini.

Norwegian Epic ta forma parti di e Norwegian Cruise Line y e barco mes ta traha na Francia na 2010. Tempo cu a trah’e, e tabata e di tres crucero mas grandi di henter mundo! Na October di aña 2015 e barco crucero a wordo renoba completo. Norwegian Epic tambe ta conoci como e crucero cu ta ofrece un show espectacular riba cada salida.

E barco ta midi 329.45 meter di largura, 40.64 meter di hanchura y 61 meter di haltura. E ta nabega cu un velocidad di 41 kilometer pa ora. E tin 19 piso, cu capacidad pa 4100 pasahero y 1724 tripulante.

Norwergian Cruise Line ta un liña crucero cu den transcurso di aña a bin ta crece y pa 2020 lo ta e un di e liñanan crucero cu lo trece mas bishitante pa Aruba.

Tur e cruceronan aki ta trece oportunidadnan nobo pa nos isla. Un oportunidad pa nos sector di turismo keda crece y florece. Ta pasaheronan cu ta keda nos isla pa mas cu 8 ora, cu e meta cu nan ta gusta Aruba y regresa despues cu avion pa vakantienan mas largo. Pues den e rato cu e pasaheronan ta pasa dia riba nos isla, ta esencial pa nan haya un bon recepcion, trato y guia, cu por sirbi como un invitacion pa nan bolbe atrobe.

Diamars ta un dia druk den centro di ciudad, cu casi 6 mil turista crucero, parti entre pasahero y tripulante,cu ta di bishita pa cera conoci cu “Aruba”.