Minister Oduber lo keda cu un bunita recuerdo di e union di MEP POR RED pa logra cosnan grandi pa Aruba
Diamars mainta, tawata tin e ultimo Conseho di Minister cu e participacion di Minister Otmar Oduber. Sin duda, pa coleganan di Gabinete Wever-Croes, esaki tawata un momento di emocion. Minister Oduber na september di e aña aki a anuncia su retiro di politica pa mas cu tur cos pone mas atencion na su salud y famia.
Despues cu Minister Otmar a anuncia su retiro, Prome Minister a expresa cu no ta un secreto cu dos aña pasa, prome cu a asumi responsabiliad di gobernacion, e relacion cu Minister Otmar Oduber no por a wordo considera como amistad siendo cu nan tawata contricante politico. Sinembargo e deseo di comunidad pa cambio expresa den eleccion 2017 tawata un les pa tur e partidonan pone diferencianan un banda y enfoca riba loke ta importante pa e pais.
Den e ultimo Conseho di Minister, den nomber di demas colega Minister, Prome Minister a gradidi Minister Otmar pa su trabou y logronan durante e dos aña como Minister encarga cu Infrastructura y Medio Ambiente. Na e ocacion tambe a entrega Minister Otmar un bunita cuadra cu potret di Ministernan pa asina Minister Otmar tin un bunita recuerdo colga den su hogar di e dos aña cu a enfoca hunto cu tur Minister di Gabinete Wever-Croes riba e union pa traha hunto pa nos pueblo y logra cosnan grandi.
Marisol Lopez-Tromp lo tuma e encargo di Ministerio di Infrastructura y Medio Ambiente. Gobierno di Aruba ta yama bon bini na sra. Lopez-Tromp pa asina continua cu e maneho di Infrastructura y Medio Ambiente. Hunto nos lo sigui logra cosnan grandi pa nos dushi Aruba.