Home » Parlamentario Shailiny Tromp-Lee (MEP):  “Investigacion di ARA ta mustra claramente cu Mike Eman no a percura pa e cobertura di e gastonan di e proyectonan PPP: Green Corridor y  Watty Vos Blvd”

Parlamentario Shailiny Tromp-Lee (MEP):  “Investigacion di ARA ta mustra claramente cu Mike Eman no a percura pa e cobertura di e gastonan di e proyectonan PPP: Green Corridor y  Watty Vos Blvd”

by Admin
0 comment 50 views

 

 

Recientemente Algemene Rekenkamer Aruba (ARA) a publica e rapport ‘Publiek Private Samenwerking’. ARA a haci investigacion riba maneho di e contracto y suministro di informacion di Green Corridor y Watty Vos Blvd cu ta basa riba un colaboracion entre sector publico y sector priva, mihor conoci como proyectonan PPP. ARA a investiga si e partidonan a y ta tene nan mes na e acuerdonan di contracto y si tabata tin suficiente bista riba e riesgonan financiero. Tambe a investiga si e informacion suministra na e partidonan envolvi, entre otro Parlamento, ta di tal forma cu nos por carga y realisa nos responsabilidad.

 

Loke sigur ta resalta y cu ta keda menciona mas biaha den e rapport ta e tristo realidad, cu di na comienso di ambos proyecto no tabatin claridad riba e cobertura di e gastonan a largo plaso. Tromp-Lee ta indica cu enberdad na ningun caminda of momento Gobierno di Mike Eman a percura pa e fondonan necesario pa cubri e gastonan di dicho proyectonan y manera Mike Eman mes a bisa e ta laga un legado na debe pa pueblo paga cu orguyo. Esaki sigur ta subraya loke MEP a bin ta enfatisa pa hopi tempo y mas cu claro ta enfatisa e grado di mal maneho di e gobierno di AVP. P’esey mes Tromp-Lee ta bisa cu cada biaha e ta keda asombra ora Mike Eman ta cuestiona accionnan di e Gabinete actual cu si ta percura pa carga nan responsabilidad.

 

Otro punto cu ta keda menciona den e rapport ta cu pais Aruba, Gabinete Wever-Croes, si a introduci temporalmente un belasting adicional pa cubri entre otro e gastonan di e proyectonan PPP, esta Green Corridor y Watty Vos Blvd. Cual nos tur sa cu ta keda referi na e crisis tax BAVP. Na mes momento ARA ta remarca cu e entradanan aki, como impuesto, ta temporal y no tin un destino specifico. Esta cu e  BAVP cu Gobierno Wever-Croes a hay’e ta introduci, su destinacion no ta mara na e pagonan di e proyectonan PPP. Pa Parlamentario Tromp-Lee mas importante ta pa sa si e entradanan cu pais ta genera mediante e BAVP ta suficiente pa paga tur e gastonan di e proyectonan  PPP (esnan existente incluso Green Corridor, Watty Vos Blvd y renobacion y ampliacion di HOH).

 

Otro aspecto y preocupacion presenta den e rapport cu Tromp-Lee ta di acuerdo cu ne ta cu e BAVP a keda introduci temporalmente, pero e realidad ta cu Mike Eman a bay laga atras proyectonan PPP cu den 18 aña (Green Corridor), 20 aña (Watty Vos Blvd) y 29 aña (HOH) mester bay keda paga. 

Gobierno  semper a indica cu nan a haya nan obliga pa bin cu e crisis tax, e BAVP, pa cubri e gastonan di PPP y pa contra aresta e forma iresponsabel cu e gobierno anterior a endeuda nos pais. Nan intencion ta pa e ta temporal pasobra no ta husto cu ta pueblo mester paga pa e mal maneho. Gabinete Wever-Croes na mas di un ocacion a indica cu nan ta buscando otro forma pa paga e debenan aki pa asina por duna un alivio na comunidad.

 

Cu e rapport aki riba mesa, ta otro prueba cu e daño cu gobierno anterior a haci contra nos pais, ta hopi grandi. Den otro relato Tromp-Lee lo sigui elabora mas riba otro conclusion y recomendacion cu a keda presenta pa ARA den e rapport aki. 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio