Dominicanessenstraat, Oranjestad: Diabierna algo despues di 11’or di anochi, e chauffeur di KIA Rio a caba di sali for di un Bar Restaurant situa den Dominicanessenstraat, ela subi den su auto y a reverse su auto sin tene cuenta cu tin un auto su tras.
E auto su tras tabata un Nissan March y e chauffeur cu tabata den e Nissan March, despues di a mira e intencion di e Chauffeur di e KIA Rio,a trata na hala pa evita e impacto pero lamentabelmente no a logra. E chauffeur di e Kia Rio tabata bou influencia.
Forensys a yega na e sitio y nan tambe a nota cu e chauffeur di e KIA Rio tabata bou influencia, mesora nan a avisa polis. Na yegada polis a laga e chauffeur supla y ela sali cu enberdad ela bebe mas cu ta wordo permiti. Nan a detene e chauffeur di e KIA Rio pa core auto bou influencia. E amigonan di e chauffeur di e KIA Rio, a lamenta masha hopi mes, cu a caba cu e trip di Diabierna anochi mucho trempan, door di a detene nan amigo. Tambe nan tabata comenta cu e daño material na e auto ta masha nada y cu nan amigo no a bebe ni dje tanto ey.