Kuerpo Polisial di Korsou ta informa: Malechornan ta rementá dos bankomátiko.

Willemstad, Korsou: Den oranan di mardugá di djaweps 5 di desèmber 2019, alrededor di 04.15, Sentral di Polis a risibí informashon di eksploshon di un bankomátiko ku tin riba Kaminda Hensley “Ban Ban” Meulens. Malechornan mester a yega einan i aplikando sistema di operashon komun, ku ya a keda usá den pasado, a rementá e bankomátiko aki. Afortunadamente nan no a logra di yega na e klùis, pues no a bai ku sèn kèsh.
Algun minüt despues a drenta otro informashon di un bankomátiko riba Jan Noorduynweg, ku tambe a keda rementá dor di 3 sospechoso. Einan tambe e destrukshon tabata supstansial, pero tampoko a logra di yega na e parti unda e sèn kèsh ta.
Mas lat a bin topa dos vehíkulo kimá den área di San Willibrordus, ku probablemente tabata enbolbí den un di e dos eksploshonnan di bankomátikonan aki.
Investigashon den e kaso aki ta kontinuá.