Den Haag: Siman pasa Diaranzon anochi a tuma luga pa prome biaha un Café literario Caribense na Den Haag. Esaki a tuma luga den Teatro Dakota cu participacion di diferente escritornan cu sea a debuta of tin un trayectoria largo caba den circulo literario. Na e anochi literario aki cu Jaswina Bihari-Elahi a organisa, a participa: Karin Lachmising, Rabin Baldewsing, Chris Polanen, Ianthe Sahadat, Quito Nicolaas y Ruben Gowricharn. E escritornan tabata ser entrevista den grupo di dos pa Frandjesca Balootje y prof. Michiel van Kempen. E parti musical tabata den man di Raj Mohan y Jhilani Wijsman. Tabata tin un publico grandi y entusiasma cu a presencia e anochi aki y na final a entercambia di idea cu e autornan.
Den e entrevista cu autor Nicolaas a combersa cu ne tocante su buki nobo ARGUS. El a indica cu mescos cu den un novela, den un poesia tambe e ta haci uzo di personahenan pa construi un poesia. Of e ta uza e locual e ta observa den sociedad pa traha un poesia. Di su banda e autor a bolbe mustra cu nos escritornan mester bandona e fronteranan di unda nan ta biba y busca manera pa inclui den un novela elementonan historico, social y haciendo uzo di temanan universal. Quito Nicolaas a trece padilanti cu un autor mester sa algo di e historia di literatura di su pais. Tambe cu e lectornan mester lesa mas di otro literatura, pa siña algo y enrikece nan conocemento di e cultura, historia y bida social den otro partinan di mundo.
Anteriormente Diasabra atardi 23 di nov. e conocido autor Arubiano tabata invitado di e Genootschap Nederland – Aruba, hunto cu sr. E. Paris como representante di Aruba na EU y e embahador di Estados Unidos sr. P. Hoekstra. Aki e poeta a declama algun poesia di su tomo nobo ARGUS, cu mester a sirbi pa refleha riba un ke otro. El a declama e.o. e poesia ‘Steen’ cu ta trata con den pasado a crea lazonan estatal. E poesia ‘Kleurboek’ cu ta ilustra e funcion di e bandera di un pais, cu ta un simbolo di confiansa y crecemento. Den ‘Onderweg’ e ta trata e pasado, cu unabes e bieunan no tei mes, di mes lo sigui conta e storianan. Y den e poesia epico ‘De wereld’s nacht’ unda e ta trata e concepto di libertad den diferente pais, el a declama e fragmento cu ta toca Oranjestad/Aruba.
Un di e poesianan cu a causa mas impacto tabata ‘Ontheemd verlangen’, cual poesia na 2004 a sirbi na momento di celebracion di 50 aña di Statuut di Reino, como e poema di apertura pa e antologia ‘Met de wil elkander bij te staan’. Su mahestad Reina Beatrix a ricibi e prome ehemplar di e buki aki. Y ta trata di e mesun poesia cu ex-presidente di Parlamento Hulandes, sra. Gerdi Verbeet a declama na aña 2011 den Staten di Aruba na ocasion di celebracion di 25 aña di Status Aparte. Den e poesia aki e poeta ta describi e proceso di para riba bo propio pianan y kico esaki a nifica den otro paisnan. E poesia aki cual a ser scirbi diesnuebe aña pasa, ainda tin su validez y mensahe historico pa nos pueblo. Pronunciando e ultimo palabranan di e poesia, a sigui un aplauso grandi di parti di e publico. Na final di e atardi hopi interesado a laga e gran autor firma e ehemplar di nan buki.
Imagennan:Jaswina Bihari-Elahi & Nico van der Ven