ORANJESTAD – E siman aki, Oficina di Turismo a lansa un campaña unico den e mercado mas grandi pa Aruba, esta di Merca, ofreciendo un pakete di vacacion special yama ‘Disconexion Electoral’ (‘Election Disconnection Experience’). E ta un programa diseña specificamente pa alivia e Mericano cu ta pasando den stress pa cu e campaña electoral Mericano cu lo tuma luga na november 2020.
Segun un encuesta recien di e ‘American Psychological Association’ (APA), 56% di adulto a laga sa cu nan ta sinti cu e eleccion binidero di 2020 ta un ‘factor significante di stress’.
E experiencia di ‘Election Disconnection’, y pues un biahe pa desconecta di stress mara na e eleccion, ta wordo mira como e prome den su estilo, y ta bay mas leu cu e experiencia di bienestar (y biahe) tradicional. Bishitantenan mester haci un test pa reconoce e sintomanan manera perdemento di apetit, insomnia, sinti sentimentonan bashi etc. E resultadonan lo conduci na un itinerario unico, personalisa cu lo brinda nan exactamente locual nan tin mester.
Ronella Tjin Asjoe-Croes, CEO di Aruba Tourism Authority a laga sa: ”Cada un persona ta deal diferente cu stress y nos kier a crea un experiencia unico pa e bishitantenan por disconecta di e stress cu nan ta sinti ya caba un aña prome cu e eleccionnan Mericano, y claro durante di e aña binidero. No ta importa na cua partido politico nan ta afilia, Aruba cu su solo briyante y su hendenan cordial lo duna e bishitantenan un alivio di nan stress electoral”.
E Mericanonan interesa por registra via VoteAruba.com, ya desde diamars dia 19 di november, ora a lansa e campaña aki. A.T.A. lo traha cu proveedornan di acomodacion pa asina pusha biaha y reservacion pa Aruba, durante 2020.