Accidente serio riba e caminda di Camacuri na altura di Do It Center, dos persona a keda seriamente herida, polis, ambulance y materialwagen di brandweer a presenta na e sitio, Un accident cu te na e momento nan aki no ta conoci con exactamente elo por a pasa.
Camacuri: Diadomingo algo pasa di 4’or y mey di marduga, presencia di polis, brandweer y ambulance a wordo pidi cu urgencia riba e caminda di grandi di Camacuri na altura di Do It Center, pa un accidente basta serio cu herido y persona pega den auto.
Na yegada enberdad nan ta topa cu un accidente basta serio, y ta bin constata cu ta trata di un accidente entre un Ford Ranger Blanco numera A 38034 y un BYD F3 shinishi numera A 56513, di ambos auto e chauffeurnan tabata hende homber. Na prome instante tur cos ta mustra cu tabata trata di un accident semi frontal, den cual un di e autonan lo a hala parcialmente na e banda contrario y a bin topa cu e otro auto for di direccion contrario.
E chauffeur di e pick up a wordo saca y benta den e mondi parti panort di caminda, e tabata keha di hopi dolor na su pia, pero segun nos a compronde e tabata mustra basta stabil y tambe e por a comunica cu e personal cu e yega pa duna e prome asistencia. E otro chauffeur di e BYD su situacion tabata mas serio, na yegada di ambulance mesora nan a cuminsa trat’e pa stabilis’e y asina brandweer por a corta e auto y liber’e for di e situacion cu e tabata den.
Brandweer cu hopi lihe a yega na e sitio a cuminsa traha di biaha pa rescata e victima for di e auto BYD, nan a corta e auto y asina logra saca e victima for di e auto, personal di ambulance despues di a stabilisa e chauffeur di e BYD a transport’e tambe cu urgencia pa hospital.
Un accidente cu hopi daño material, cu ambos chauffeur a keda herida y a wordo transporta cu urgencia pa hospital, pero te na e momentonan aki no tin informacion oficial con e accidente aki a sosode .