Willemstad, Korsou:Djaweps 14 di novèmber 2019 alrededor di 09.45’or, Sentral di Polis a risibí notifikashon di un kaso di atrako ku a tuma lugá na un kas na Tera Kòrá. E promé unidat polisial ku a yega na e sitio a kuminsá ku un investigashon preliminar i a resultá ku dos hòmber a drenta un kas na Tera Kòrá i bou di menasa ku arma di kandela a eksigí e habitante di kas pa duna nan sen kèsh.
Un di e sospechosonan a maltratá e habitante ku kabu di pistol na su kabes, kue algun pertenensia i sali for di e kas. Na momentu ku nan a sali pafó e sospechosonan bou di menasa ku arma di kandela a hòrta un outo di C-post ku na e momentu ei tabata pará pafó di e kas i bai for di e sitio.
Mas despues a señala e vehíkulo di C-Post para bashí den área di Wechi. Kontinuando ku e investigashon polis a nota un vehíkulo sospechoso den área di Juan Domingu i a para esaki. Durante di un kontrol den e vehíkulo i riba e hòmber shofúr i a resultá ku esaki ta envolví den e atrako ariba menshoná i a detené e shofúr.
Polis a sigui ku búskeda den e área i a señala dos hòmber ku na momentu ku nan a mira e unidat polisial a kuminsá kore. A kuminsá ku un persiguishon na pia tras di e sospechosonan i a detené nan.
E detenshonnan ku polis a hasi relashoná ku e atrako ariba menshoná, ta di e hòmbernan:
• S.J.H.C. nasé na Bonaire di 28 aña di edat;
• S.M.M. nasé na Kòrsou di 24 aña di edat;
• R.L.E. nasé na Kòrsou di 28 aña di edat.