Siman pasa na Cas di Cultura a tuma luga e apertura di Siman di Buki di Mucha. Prome Minister Evelyn Wever-Croes tawata presente na e ocacion aki na unda cu el a cera conoci cu escritornan di Aruba, Colombia y Boneiro. Siman di Buki di Mucha ta un bunita celebracion di lesamento cu nos por brinda nos muchanan. Ban stimula nos yiunan y nos nietonan pa nan desaroya e habito di lesa buki. Lesamento ta habri un mundo di conocemento nobo pa cada mucha y nan lo experiencia aventuranan inolvidable.
Durante apertura di Siman di Buki di Mucha, Prome Minister a ricibi un buki di su ex colega Richard Dabian “E Faro di Multicolo”, “De Veelkleurige Vuurtoren”. Scol Pius X a presenta e storia den un tremendo actuacion. Segun Richard, esaki ta su dream job.
For di man di Denise de Jongh-Rekwest di Boneiro Prome Minister a ricibi su buki “Bin, bin sigui mi submarin”, un buki hopi bunita pa nos stimula nos muchanan pa lesa y conoce aventuranan grandi.
Tambe Prome Ministter a cera conoci cu sr. Pedro Vargas di Colombia, escritor di buki di mucha cu ta participa e aña aki. Ta bunita pa mira escritornan di diferente luga di mundo hunto na Aruba pa e siman importante aki.
“Mi ta encurasha tur mayor y cuidado di nos muchanan, pa cuminsa lesa cu nan di trempan y conta nan storia. Esaki ta e miho regalo cu nos por duna nos muchanan. Lesamento ta habri un mundo grandi pa nan y por ta un fuente di inspiracion y aventura pa nan”, Prome Minister Evelyn Wever-Croes a expresa.